Tirkîya de yew qirkerdişê serranê 90î ra zî Qirkerdişê Gazî yo. 30 serrî verê cû 22 kesî kê qirkerdişê Gazî de ameyî kiştiş, kiştox û berpirsîyarê cî hema zî nêameyî cezakerdiş. Waştişê edaletî yê şarî hema zî dewam keno.
Îstanbul de 12ê Adare 1995î de, saete 20:45î de kesê ke nasnameyê înan nêameyo tesbîtkerdene, taksîya xespkerdî reyde, Taxa Gazî de pê çekan qehwexaneyê Ontaş, Yawuz û Dostlarî û Pastaxaneya Sariogluyî dayî gulleyan ver. Encamê êrişî de Pîrê Elewîyan Halil Kaya yê 76 serrî ame kiştiş, 25 kesî ke 5 hebî înan giran bî, ameyî birîndarkerdiş. Dima êrişkaran şoforê taksî ke remnaybî, kişt û vindî bîyî.
Badê eşnawîtişê êrişî, şarê Taxa Gazî kewt kuçeyan û êriş protesto kerd. Polîsan zî şarî ser o êrîş kerd û Mehmet Gunduz kişt. Roja bîne bi hezaran kesî ke seba merasîmê cenazeyî vera cemewî de kom bîbî, înan ser o êrîşî ameyî kerdene. Nêmroje ra ver hîrê kesî, dimayê nêmroje 12 kesê bînî cuya xo vindî kerde. Înan pêro zî bi mermîyan merdbî. Zaf kesê ke mîyanê înan de rojnamegerî zî est bî, birîndar bîbî. Eynî roje Walîtîya Îstanbulî Gazî, Taxanê Zubeyde Hanim û Esentepeyî de qedexeyê vejîyayîşê teberî îlan kerd. Dekewtiş û vejîyayîşê taxan de barîkatê polîsan ameyî roanyene û dekewtiş û vejîyayîş binê kontrolê polîsan de ame kerdene. Qedexeyê vejîyayîşê teberî nêeşkîya vernîya xoverdayîşê Taxa Gazî bigîro. Seba naye yewîneya eskerî şîye uca.
Nê mabênî de, Anqara de Qirkerdişê Gazî û qedexeyê vejîyayîşê teberî Kizilayî de ameyî protestokerdiş; polîsan êrişê xoverdayoxan kerdbî û 36 kesî birîndar bîbî.
Umranîye de 5 Kesî ameyî kiştene
Şarê Taxa 1ê Gulane ya Umranîye zî, seba protestokerdişê qirkerdişê Taxa Gazî, 15ê Adare de kewt kuçeyan. Polîs tîya de zî şarî ser o hêrîş kerd. A roje Taxa 1ê Gulane de zî panc kesî ameyî kiştene.
Hasan Ocak ameybî vindîkerdene
Çar rojan de 17 kesû Taxa Gazî de û 5 kesî Taxa 1ê Gulane de pêro pîya 22 kesî ameyî kiştene, 300 ra vêşêr kesî zî birîndar bîbî. Encamê otopsî ke ame kerdene, mojneno ke 17 kesî ke ameyî kiştene, cuya xo bi mermîyanê polîsan vindî kerdbî.
Hasan Ocako ke xoverdayîşê Taxa Gazî de bî, 21ê Adare de ame tepiştiş û vindîkerdiş. Encamê têkoşînê keyeyê ey û yê raya pêroyîe, meyîtê Hasan Ocakî ame vînayene.
Mudirê Emnîyetî yê Îstanbulî Necdet Menzir bî
Wexto ke Qirkerdişê Gazî qewimîya; Mudirê Emnîyetî yê Îstanbulî Necdet Menzir bî. Mudirê Pêroyî yê Emnîyetî Mehmet Agar ke destur daybî polîsan, bi vatişê “Ma 1000 operasyonî kerdî” qirkerdiş pawit. Walîyê Stenbolî Hayri Kozakcioglu, seba ke vernîya serebûdan bigîro, qedexeyê vejîyayîşê teberî îlan kerdbî û Taxa Gazî dekerdbî binê ablukeya polîsan. Wezîrê Karê Zereyî Nahit Menteseyî vatbî “Polîsan sîlah nêşuxulna”. Serekwezîre Tansu Çiller vatbî “Hem keso ke seba welatî mermî weno, hem zî oyo ke erzeno, şerefin o”. Suleyman Demîrel zî Serekê Cumhurîyetî bî. Înan ra yew zî nêameyî muhakemekerdiş.
Qirkerdişê Gazî 28 serran vîyartişî ra teber, berpirsîyarê rastikênî tarîtî de verdîyayî. Dawaya ke qirkerdişî ra pey ameybî akerdene, tede tena 20 polîsî ameyî muhakemekerdiş. La mîyanê înan de berpirsîyarê berzî çin bî. Tena bi cezaya hepsî ya 4 serre û 32 aşmî yê di polîsan qedîya.
