Wekîla DEM Partîye ya Mêrdînî Bêrîtan Guneş destnîşan kerd ke vengdayîşê Rayberê Şarê Kurd Abdullah Ocalan do çar parçeyê Kurdistan û Rojhîlatê Mîyanên de bibo çarenuştê şaran û va: “Vengdayîşê Rêzdar Abdullah Ocalan behsê komelo demokratîk û bi pîya cuyayîşî keno.”
Deklerasyonê Newroza 2025î bi rayberîya Kongreya Komelê Demokratîke (KCD), Partîya Herêmanê Demokratîke (DBP), Têgerayîşê Cinî yê Azade (TJA) û DEM Partîye 11ê Adare de verê Sûranê Amedî de bi dirûşmê ‘Rayberîya Azad, Komelo Demokratîk’ ame dayene.
Dima deklerasyonê Newroze emserre destpêkê qezaya Licê ya Amedî de ame pîrozkerdene. Wekîla DEM Partîye ya Mêrdînî Bêrîtan Guneş derheqê maneyê Newroze û vengdayîşê Rayberê Şarê Kurd Abdullah Ocalan ser o ajansê ma rê qise kerd.
Agirê Newroze do pêroyîya welatî ra vila bibo
Bêrîtan Guneşe dîyar kerd ke Newroza emserre seba vengdayîşê Rêzdar Abdullah Ocalan zafêr tarîxî û wayîrê maneyî yo û wina va: “Adirê Newroze ye ke ma Licê de pêvist do pêroyîya welatî ra vila bibo. Newroza Licê û ya emserre seba ma zaf manedar a. Seba ke emserre ma Newroze bi hêvîya azadî û aştîye pêşwazî kenê. Her wina ma eşkenê bivajê ke adirê Newroza emserre 27ê Sibate de hetê Rêzdar Abdullah Ocalan ra seba şaran ame vistiş. Na Newroze seba ke heme şar pîya, aştîyêka bi rûmet biciwî zaf manedar a.”
Newroza emserre Newroza komelê demokratîke ya
Berîtan Guneşe bal ant ser avzelîya komelê demokratîke û wina domna: “Vengdayîşê Rêzdar Abdullah Ocalanê 27ê Sibate de bi temamî behsê komelê demokratîke keno. Behsê pîya cuyayîş û demokrasî keno. Seba ci şîyarê ma yê na Newroze ‘Rayberîya azad komelo demokratîk’ o. Ma nêeşkerê komelêko demokratîk awan bikerê, ma do nêeşkerî bi awayêkî azad û demokratîk zî biciwî. Newroze her tim seba şarê kurd bîya serehawanayîşê verba zilmî. Newroze de şarê kurd xo newe ra xulq kerdo.”
Wayîrvejîyayîşê Newroze wayîrvejîyayîşê vengdayîşê 27ê Sibate yo
Berîtan Guneşe da zanayîş ke ê wazenê do vengdayîşê Rayberê Şarê Kurd Abdullah Ocalan çar parçeyê Kurdistan û Rojhilatê Mîyanên ra bibo çarenuştê şaran û wina qedîna: “Çareserkerdişê problemê Rojhîlatê Mîyanên bi çarenuştê paradîgmaya Birêz Abdullah Ocalan ra girêdayî yo. Êdî nê tena şarê kurd, durzî û elewîye zî çareserî na paradîgma ra dîyenê. Ma eşkenî bivajê ke no têkoşîn û paradîgmaya ma Rojhîlato Mîyanên bedilna. Newroze zî her tim xizmetê bedilnayiş, serehawanayîşî kerdo. Ma zî Newroza vejîne, aştî pîroz kenê. Wayîrvejîyayîşê Newroze wayîrvejîyayîşê vengdayîşê Birêz Abdullah Ocalanî yo. No ser na Newroz seba heme şaran tarîxî ya, wa ma tarîxê xo ra wayîr bivejê, ma têkoşînê xo berzêr bikerê.”
