Dayîka Aştî Sakîne Arat ke bi serran o xoverdayîşê şarê kurdî de ca girewto, vizêr şande şî heqîya xo.
Sakîne Arat ke wextêko dergî ra yo xoverdayîşê şarê kurdî de tewr vernî de cayê xo girewto, cuya xo vîndî kerde. Goreyê malûmatan ke tornê aye ra ameyê girewtene, vizêr şîya heqîya xo û morgê nêweşxaneyêko taybet de yena tepiştene.
Ame zanayene ke meytê Sakîne Arat do siba bêro wedaritene
Sakîne Arat emrê xo mîyanê xebatanê aştî û azadîye de vîyarnayo. Mîyanê nê xebatan de bîyayîş helbet xo reyde bedelêko gird zî ano. Dayîka Sakîne serewedaritişî Şêx Seîdî ra nat dejêk ancena. O wext zî keyeyê aye ameyo surgunkerdene, dima ra agêrenê Amed. 8 heb gedeyê dayîka Sakîne est ê. Aye bi ked û xebata xo heme gedeyanê xo pîl kena. Yew lajê aye qezaya trafîkî de cuya xo vîndî keno. Kênaya aye Semra zî seba ke aye bizor zewicnenê, xo kişena. Lajê aye Cemal Arat 2ê adara 1984î de rojeyê mergî de Hepîsxaneyê Amedî yê Hûmara 5. de cuya xo vîndî keno. Lajê aye yê bînî Tacettîn û Mûrat tewrê hereketê azadîye yê kurdî benê û verê xo danê koyan û uca de şinê heqîya xo.
Dayîka Sakîne o wext zî wina vana ‘Mi gedeyê xo vîndî kerdê la mi hêvîya xo vîndî nêkerde. Seba aştî bêra nê welatî ez xover dana.’ Hende bihêz hende têkoşer…
