Welatijê ke beşdarî kombîyayişê Şarî yê Amedî bîyê, derheqê vengdayîşê Rayberê Şarê Kurd Abdullah Ocalanî de dîyar kerd ke ê do seba azadîya fizîkî ya Rayberê Şarê Kurd Abdullah Ocalan têkoşîn bidê û vatê: “Ma bi Rayber Abdullah Ocalanî bawer ê.”
Heyetê Îmraliyî yê DEM Partîye 27ê Sibate de vengdayîşê “Aştî û Komelo Demokratîk” yê Rayberê Şarê Kurd Abdullah Ocalan raya pêroyî rê eşkera kerd. Dimayê vengdayîşo tarîxî Kurdistan û Tirkîye de zaf beyanatî seba piştîdayîşî ameyê dayene. DEM Partî seba avzelî û maneyê vengdayîşê bido famkerdiş qerar da ke 100 heb cayî de kombîyayîşê şarî viraza. DEM Partî 12ê adare de Salonê Merkezê Kongre û Kulturî yê ÇandAmedî de kombîyayîş viraşt. Zaf welatijî beşdarî kombîyayîşî bîyê. Welatijê ke beşdarî kombîyayîşî bîyê derheqê vengdayîşê Rayberê Şarê Kurd Abdullah Ocalanî de ajansê ma rê qisey kerdê.
Welatij Kerîma Okutucu dîyar kerd ke vengdayîşê Birêz Abdullah Ocalanî zaf avzel o. Ê vengdayîşî ra hêvîdar ê û wina va: “Hêvîya ma na ya ke çikê ke vengdayîşî de tena yenê waştiş pê bêrê. Bi hezaran merdim ameyê kiştiş, hepskerdiş û koçberkerdiş. Lazim o ke hesabê înan bêro dayene. Birêz Abdullah Ocalanî game eşte. Wa dewlete zî goreyê ci gaman bierza. Eke cewabêk nêro dayene pêvajo aver nêşono. Nika rayîrêk verê ma de est o, ma wazenê heme şarê ma nê rayîrî rê wayîr vejîyo.”
‘Wa pêvajo goreyê rêbazanê Abdullah Ocalanî aver şîro’
Hisên Erzî ard vîr ke Abdullah Ocalanî her dem waşto ke no problem bêro çareserkerdene û wina va: “Serran ra ver zî Birêz Abdullah Ocalanî zaf reyan pêvajo dabî destpêkerdene. Wa merdim fikr û ramananê Birêz Abdullah Ocalanî bimeşo û goreyê ci wayîrê na pêvajo vejîyo. Nika avzel o ke no pêvajo mîyanê şarî de bêro nîqaşkerdene, cigêrayîş bêrokerdiş ke netîceyê nê pêvajoyî bêro girewtene. Êdî wa na gonî vindera. Wa şarê ma yo ke bi serran o ked dano, wa wayîrê nê pêvajoyî vejîyo.”
Cengîz Yakut da zanayîş ke waştişê şarê Kurd her tim aştî ser o bî û wina va: “Awankerdişê aştî zaf zehmet o. Ma bawer ê ke pêvajo biko armancê xo, xo ra şarê kurd her tim destê aştî derg kerdo. Birêz Abdullah Ocalanî gameeşte, nika dora dewlete ya. Ma qerardar ê û ma do pêvajo rê wayîr vejîyê.”
