Baroya Amedî, TUAY-DER, OHD û ÎHD pîya raporê 16 hepisxaneyî hadre kerdê. Goreyê raporê hepisxaneyan de kurdkî, dermankerdişî ra astengî vejenê û bi pergalî zî hepsîyan zit gêrenê.
Baroya Amedî, TUAY-DER, OHD û ÎHD pîya raporê îxlalê hepisxaneyan aşkera kerdê. Rapor banê Baroya Amedî de ame aşkerakerdiş û raporî zî Sekreterê Komîsyonê Hepisxanayan ê Baroya Amedî Ahmet Guler aşkera kerd.
Ahmet Guler dîyar kerd ke ganî pergalê tecrîdî yê Îmraliyî bi lezûbez bêro hawanayîş, AÎHM’î heqê hêvî yê Abdullah Ocalanî ser o qerar da û no ser ganî no qerar bi lezûbez bêro caardiş û wina va: “Demo nêzd de seba çareserîya Kurd Birêz Abdullah Ocalan vengdayîşo tarîxî da. No ser ganî pergalê tecrîdî birijyo. Raporê ma de zî dîyar o ke hepsîyan ra demê sewqkerdişê nêweşxaneyî de problem vejenê, dermankerdişî zî bi kelepçe kenê. Rojnameyê sey Yenî Yaşam û Evrensel hepsîyan ra nînê dayene, kitabê kurdkî qedexe kenê, hewna seba açarnayox pere wazenê. Hepsîyan ra cayê dermanî yê goreyê nêweşîya înan nê, dermanê bîn yenê dayene.”
Rapor de pêşnîyaz û tesbîtan wina ameyê kerdene:
“*Ganî îdareyê hepisxaneyan verpirsîyarîya xo bîyarê ca, goreyê mevzuat û huquqê mîyanêneteweyî û qanûn hereket bikerê. Heqê weşî, dermakerdiş, malûmatgirewtiş, azadîya îfadeye heqê mîyanêneteweyî yê.
*Ganî heqê wezîfedar û karmandê ke hepsîyan ra îşkence, teda û zilm kenê de cipersayîş bêrê kerdene.
*Hewna hepsîyê neweş bi lezûbez bêrê veradayîş ya zî înfazê înan bêrê taloqkerdene.
*Rewşa hepsîyê nêweş goreyê nêzdîbîyayîşê klînîkî bêro ercnayîş, hepsê nêweşî ke raporê înan est ê bi lezûberz bêrê serbestveradayîş.
*Maddeya 16. Qanûnê Înfazî goreyê rewşa hepsê nêweşî bêro bedilnayîşî.
*Demê gêrayîşî yê hepsîyan de nêzdîbîyayîşêko sey tacîz yeno kerdene û demo ke hepsî vera nê nêrazîbîyayîşî reaksîyon nîşan bidê sewqê nêweşxaneyê înan yeno astengkerdene.
*Teberê rûmetê merdimeyîye zereyê fekê hepsîyan yeno gêrayîş, ganî bi lezûbez hepsê nêweş nêweşxaneyî ra bêrê sewqkerdene.
*Miqataya hepsîyan weş bêro kerdene, takvîyeya vîtamînê înan nîro kêmkerdene.
*Ganî hepisxaneyan de hûmara personelê weşî kêm nêba, goreyê pankkerdişî hepisxaneyan newe ra bêrê dîzaynkerdene.
*Hepisxaneyan de lazimeya awe, nê anene cayê xo, hepsîyan nêeşkenê pakîya xo ya şexsî bîyarê ca. Verba nêweşîyê janî de ganî vergirewtişan bîyarê cayê xo.
*Ganî hepsîyan bi rehetî avûkatê xo reyde têkilî ronê. Hepsîyan bi rehetî heqê waştişnameyê xo bîyarê ca.
*Zîyaretkerdoxê hepsîyan ra nêzdîbîyayîşêk goreyê mevzuatê mîyanêneteweyî û qanûnî bêro nîşandayene. Gêrayîşê zîyaretkerdoxan goreyê rûmetê merdimeyîye bêro kerdene.
*Kes û sazîyê ke nê cigêrayîş kerdê hukmat dawetê goreyê hereketkerdişê Protokolê Pêameyişê Mîyanêneteweyî kenê, ganî heyetê xoser kontrolê hepisxaneyan bikerê.”
