Cinîyê femînîstî yê “Înîsîyatîfê cinî yê aştîye qisey kenê” dîyar kerdî ke aştî her tim rojeva cinîyan de bîya û vatî, aştîya komelî lazimîya sereyîn a û do semedê aştîye têkoşîn bikerê.
22-23yê sibate de Stenbol de komxebata “Cinî aştîye qisey kenê” pê ame û badê nê “Înîsîyatîfê Cinîyan ê Lazimîya Mi Bi Aştîye Est a” ame awankerdiş. Badê komxebate netîcename ame parekerdiş û ame dîyarkerdiş ke do semedê aştîye têkoşîn bêro dayîş, berpirsyarî bêrê girewtiş.
“Înîsîyatîfê Cinîyan ê Lazimîya Mi Bi Aştîye Est a” Roza Kahya û Zeynep Demîrkol derheqê xeta têkoşînî de qisey kerdî.
Roza Kahya dîyar kerd ke komxebate de 100î ra zêdeyêr cinî ameyê têhet û vat: “Wan, Colemêrg, Êlih ra femînîstî ameyî komxebate. Ma padayîşê komaleyê cinîyan ser, vindarnayîşê xebatê cinîyan yê hetê qeyûman ra pê ameyî, vindarnayî. Ma sey têgêrayîşê cinîyê kurdî û femînîstî lazimî dî ke ma bêrê têhet. Semedo ke aştî her tim lazimîya ma ya sereyîn a. Coka ma ameyî têhet.”
‘Hedefê ma awankerdişê zemînêk pratîk o’
Roza Kahya dewam de wina vat: “Yê tewr zêde şerî ra tesr benê, cinî û tutê. Ma xeta şovenîzm û mîlîtarîzmî yê Tirkîya ra biewnê; dişminîyê hemverê kurdan, babeta vatişî ya. Komxebate de babeta tewr zêde ma ser de vindertî no bi. Kurdistan de polîtîkaya binpaykerdişî yena kerdiş. Bi destê hêzê asayîşî hemverê cinîyan de polîtîkaya desteştişî, şîdetî yena kerdiş. Hedefê ma o yo ke ma zemînêk pratîk awan bikerê. Ma zanê, aştî tena demokrasî nîya. Aştî aramîye ya. Ma wazenê lazimîya aştîyêke mende cinîyan rê qal bikerê.”
Hetê cinîyan de qiseykerdişê aştîye
Zeynep Demîrkol bale ant awankerdişê înîsiyatîfî ser û vat: “Ma têhetameyîşê cinîyan muhîm vînenê. Ma aştîye ser o ercnayîş kerd û coka ma Înîsîyatîfê Ez Aştîye Wazena awan kerd. Ma bale ant muhîmîyê munaqeşekerdişê pîya cayê ke ma vînenê şîdetê ekonomî ser û şîdetê camêrdî senî cuya ma keno binê ablûqa. Ma zanê ke şer tesîrêk senîn cuye ser o keno. Na babete de îmtîhanê ma zî est o. Nê semedî ra ma hetê cinîyan ra qalê aştîye bikerê. Ma fikrîyenê ke muhîm o ke cinî û LGBT yê beşê bînî aştîye ser o qisey bikerê. Ma do sey cinîyê femînîstî têkoşînê aştîye dewam bikerê.”
