Verfeka Meclîsê Dayîkê Aştîye Havva Kiran derheqê hêrişê Tirkîya û hêzê paramîlîter yê girêdayeyê ci yê hemverê Vakur û Rojhelatê Sûrîye de qisey kerd û vat ke nê hêrişan de berjewendîyê dewletan est o û dîyar kerd ke ganî nakokîyê derheqê Abdullah Ocalanî de bêrê wedaritiş
Hêrişê Tirkîya û hêzê paramîlîter yê hemverê Vakur û Rojhelatê Sûrîye dewam kenê. 27ê teşrîna peyêne ra heta nika hêrişî dewam kenê û tutî, cinî û sîvîlî hedef yenê girewtiş û qetilkerdiş. Herême de têgêrayîş dewam keno. Bi dehezaran multecî koçê cayê ke îdareyê xoserî yê demokratîke kerdo, kenê. Verfeka Meclîsê Dayîkê Aştîye yê Amedî Havva Kiran derheqê hêrişan de qisey kerd.
‘Bi nakokî têgêrenê’
Havva Kiran wina dest pêkerd: “Vatişê înan ê çareserî xapxapik ê. Kewtê krîz û bi nakokî têgêrenê. Çira heta ewro vindertî. Eke ewro wurzenê wina vanê, belî yo çîyêk bîn tîya de est o. Ez venga pêro kesî kena. Ma sey Şêx Saîd, Seyîd Riza, Qazî Mihemed têbigêrê. Wa ma mexapênê. Bi 6 serrî yo ne keye û ne zî avûkatî nêeşkayîne Abdullah Ocalanî dir pêvînayîş bikerê. Nê pêro nakokî yê. Qanûn de cayê nê çin o. Kurdan ser o bi çekanê NATOyî adir varênenê. Koyanê kurdan veşnenê. Bi destê çeteyan hêrişê Rojawanî kenê. Rojawan ra bigîrê heta Halep û Şamî hêriş kenê.”
‘No wehşet pêro merdimayî rê yeno kerdiş’
Havva Kiran dewam de wina vat: “Ma venga netew dewletan kenê. Pêro dewletan ra tutê înan semedê Kobanê tewr bî û şer kerdî şehîd kewtî. Gonîya tutanê welatanê xerîban Rojawan de rijîya. Ewro ma dayîkê aştîye veng danê. Wa destê xo bikerê binê kerra. No şer hemverê qanûn û huqûqî yo. Ma nê qebûl nêkenê. Tutê ma zî ûca de şehîd bîyî. Rihê seferberî ûca de awan bî. Ûca de herêma tamponî est a. Ganî Amerîka û Rûsya ûca bipawê. La veng înan ra nîno. Berjewendîyê înan babeta vatişî ya. Semedê berjewendîyê înan gonîya tutan rijîyena. No wehşet pêro merdimayî rê yeno kerdiş. Ma bêvengîya dinya şermezar kenê.”
Havva Kiran tewr peyîn wina bale ant şerî ser: “Rojawan cayê petrolî yo. Pêro dinya petrolî ser o ciwîyenê. Petrolê Rojawanî vindero do cuye vindero. Herrêka bi erc a. Her kes wazeno wayîrê a herre bibo. Wa no şer êdî wa vindero. Ma dayîkî veng danê, wa Rayber Apo bîyarê û peynîya şerî bîyarê. Wa dayîkî mebermê. Heqê kamî çi bibo wa bêro dayîş.”
