Belma Nêrgisa ke Zîndanê Girewteyê Tîpê Tyî yê Wanî de ya, pêwa problemê xo yê weşîye yê giranî, nênê dermankerdiş.
Hemsereka Pêroyî ya Partîya Têduştî û Demokrasî (DEM Partî) Belma Nêrgis ke Zîndanê Tîpê Tyê Wanî de tepişte ya, pêwa problemê aye yê weşîye yê giranî, nêbenê nêweşxane. Belma Nêrgisa ke pêvînayîşê avûkatê xo dir problemê xo yê weşîye de agahî da, dîyar kerd ke aye nêeşkena çîyêk biwero û bişimino û semedo ke werdo ke wena, tesîrêk negatîf bedenê aye ser o keno. Belma Nêrgise sewbîna dîyar kerd ke bedenê aye hemverê werdê ke wena de reaksîyonêk zaf negatîf mojneno û dîyar kerd ke hîn werdî zî benê sebebê tesîrê giran û rewşa aye giranêr kenê.
Belma Nêrgise sewbîna dîyar kerd ke semedo ke nêeşkena werd biwero, hêzê aye qedîyayo û semedo ke demêk derg o nêeşkaya werd goreyê bedenê xo bigîro, pê hesîyaya ke sîstemê bedenê aye zeyîf bîyo û bedenê aye sewîyeya rincanî de yo.
‘Beno ke bibo sebebê mergî’
Avûkat û merdimê Belma Nergise dîyar kerdî ke pêwa xeylêk reyan îdareyê zîndanî dir derheqê rewşa aye ya weşîye de waştişname nuştê zî, nêşirawitê nêweşxane û ganî tewr lez sewqê nêweşxaneyî bêro kerdiş. Avûkat û merdimê aye îqaz kerdî û vatî: “Lazim o Belma tewr lez wextî de wedarnê nêweşxaneyêk û hetê doktoranê pisporan ra bêro muayenekerdiş. Çiqas erey manena, sebebê problemê weşîye yê cidî yê ke nînê agêrayîş û heta tehlukeyê mergî zî beno.”
