Pîrozkerdişê Newroze yê Agirî de ke vera qetilkerdişê yew keyeyî Kobanî de reaksîyon ame nîşandayene, hukmatî rê vengdayîş ame kerdene ke “No proses bi hawayêko yewhetî dewam nêkeno.”
Merkezê Agrî de bi dirişmeyanê “Raybero Azad Komelo Demokratîk” û “Komelê Demokratîk seba Azadîye” pîrozkerdişê Roşanê Newroze virazîya. Bi hezaran kesî beşdarê pîrozkerdişî bîyî. Welatî bi cil û berganê kurdîyan serê sibayî ver bi Pazarê Samanî şîyî ke tede pîrozkerdiş ame viraştene. Ciwan û cinîyan vera pîrozkerdişî eleqe nîşan da û vengdayîşê Rayberê Şarê Kurdî Abdullah Ocalanî ame selamkerdiş. Rey-rey slogan û dirişmeyê “Bijî Serok Apo” meydanî de berz bîyî. Welatî demêko derg bi muzîk û zirne-dewule ke sahneyî ra ameyî pirodayîş, govende girewte.
‘Hewceyîyanê vengdayîşî bîyarê ca’
Endama MYK’yî ya Partîya Herêmanê Demokratîkan (DBP) Muazzez Orhan va: “Newroze azadîye ya, estbîyayîş o, aştî ya. Ez nika ra aştî û komelê demokratîkî pîroz kena. Eke ma ewro nê meydanî de na Newroze pîroz kenê, netîceyê xoverdayîşê şima yo. Agirî bi xoverdayîşê xo tarîx nuşto. Pêşengê tewr pîlî yê nê xoverdayîşî zî cinî yê. Newroze, seba şarê Kurdî, xoverdayîşê vera zilmî yo.”
Muazzez Orhan bale ante vengdayîşê Abdullah Ocalanî ser o û va: “Ewro kesê ke şarê Kurdî bi înkar û îmha wazenê ke vindî bikerê, reyna seba çareserîye kewtê berê Îmralî ver. Reyna kewtê berê Rêzdar Ocalanî ver. Tîya ra ma reyna persenê; şima paweyê çîyê yê? Rojî vîyartî la şima hewna cewabê vengdayîşê Rêzdar Ocalanî nêdayo. No proses bi hawayêko yewhetî dewam nêkeno û seba ke hêsrî nêrişê ganî gamî bêrê eştene. Şert û mercê Rêzdar Ocalanî baş bikerê.”
Reaksîyon vera êrışê Kobanî
Parlementerê DEM Partî yê Agrî Sirrî Sakikî zî va: “Kurdî, Surîye de Şamî reyde bîyê embazê hukmatî. Ma zî vanê ke nê welatî de bêrê ma destê xo bidê yewbînan û ma pîya nê welatî de cumhurîyetê demokratîkî awan bikê. Rêzdar Ocalanî 27ê Sibate de Îmralî ra vengdayîşêk kerd. Va ‘Ma 50 serrî yo ke têkoşîn danê. 50 serrî yo nê wareyan de dej û şîddet est o, ma gonî û şîddet nêwazenê, ma ronişê pîya cumhurîyetêkê demokratîkî awan bikê.’ Şarê ma gonî û şîddetî ra eciz bîyo û rayîrêko newe wazeno. Sey şarê Kurdî ma do rayîrêko newe akerê. Rêzdar Ocalan naye vano û ma zî hetê ey de yê. Hetêko bîn ra însanî bi SÎHAyan yenê bombekerdiş. Nê çîyî ganî prosesan de aştî de nêbê. No, vera ruhê aştî yo. Ronişê û Kurdan reyde yew huqûqê embazîye virazê. Rojava ra çi wazenê? Wa bieşkîyê bi xo qederê xo tayîn bikerê.”
‘Ganî Rêzdar Ocalan azad bıbo’
Sakikî bale ant ke ganî heme kesî destê xo dekerê binê kerra û wina dewam kerd: “Rêzdar Ocalan nê prosesî de yew manîfesto mojneno. Coka ganî hukmat zî hem herême de hem pêroyîye de goreyê ruhê nê prosesî hereketê biko. Eke şima aştî bikerê, a game şima do tecrîdê Rêzdar Ocalanî wedarnê. Hepsîyê nêweşî ke zindan de yê, derhal verdê, hazirîya afûya pêroyî bikerê, îpotekê ke şima serran ra sereyê ziwan û nasnameyê Kurdan de kerdo, wedarê. Eke şima naye bikê, Kurdî zî do nê prosesî ra bawer bikê. Nê dewrê muzakereyan de ganî herkes piştî bido prosesî. Rêzdar Ocalanî tu rojêk nêvato ‘mi azad bikerê’, la ma vanê ganî o azad bibo.”
Badê qiseykerdişî, adirê Newroze ame veşnayene. Şarî, dormeyê adirî de bi dirişmeyanê “Bijî Serok Apo” govende girewte. Pîrozkerdiş bi deyîranê hunermendê Jehremarî qedîya.
