Şarê Wanî serê sibayî ra hazirîyê xo kerdî û kom bi kom taxa û kuçeyan ra verê xo da Meydanê Newroze. Herikîyayîşê şarî yê Meydanê Newroze dewam keno.
Ewro do 10 cayan de bi dirişmeyê “Raybertîya Azade Komelo Demokratîk” bi pêroyî Newroze bêro pîrozkerdiş. Nê cayan ra yew ca ke bi se hezaran şar Newroze pîroz keno, bajarê Wanî yo. Her serre Wan de bi beşdarîya se hezaran Newroze yena pîrozkerdiş. Cayê pîrozkerdişê Newroza Wanî na serre zî nêvurya. Pîrozkerdiş kîşta Kela Wanî de yeno viraştene. Şarê Wanî saetanê serê sibayî ra verê xo da Meydanê Newroze. Şar şefeqî ra hewn ra wirzîyayo, bi cil û berganê Kurdkî xo xemilinayo û kom bi kom verê xo dayo Meydanê Newroze. Tena merkezê bajarî ra ney qeza û dewan ra zî bi hezaran kesî herikîyenê meydanê Newroze. Zaf cinî û ciwanî beşdarê pîrozkerdişî bîyê û zafîya înan zî cil û bergê Kurdkî xo ra dayî.
Coşê meydanî zêde beno
Ameyîşê şarî reyde kewtişê meydanî 4 nuqteyan ra dest pêkerd. Şar, pê deyîranê Kurdkî govende gêno û bi coş Newroze pîroz keno. Coşê meydanî û şarî her ke şono zêdeyêr beno. Meydanî de beyraqê kesk, sûr û zerdî her ca xemilnenê. Meydanî de xeylê rey sloganê “Bijî Serok Apo” berz beno.
Hemsereka DEM Partî ya Pêroyî Tulay Hatîmoğullarî, Hemserekê DBP’yî yo Pêroyî Keskîn Bayindir, endama Heyetê Îmralîyî û Parlementera Wanî Pervîn Buldan, endamê MYK’yî yê KKP’yî Sînan Çîftyurek, Hemşaredarê Bajarê Girdî yê Wanî Neslîhan Şedal û Abdullah Zeydan û zaf sîyasetmedarî do pîrozkerdişî de qisey bikerê. Eynî wext de hunermend Rojda, Arhat û Fîkret Goyî do vejîyê sahne ser.
