Kesê ke tewlê Newroze bî înan ra tayîne ajansê ma rê qesî kerd. Vengê pêrûne azadîye de, aştîye de, rindîye de, bereket de, weşîye de rest pê.
Newroza Dêrsimî Meydanê Seyît Rizayî de bi coş ame pîrozkerdene. Kesê ke tewlê Newroze bî înan ra tayîne ajansê ma (AW) rê qesî kerd. Vengê pêrûne azadîye de, aştîye de, rindîye de, bereket de, weşîye de rest pê.
Mercan Gerçeka ke lajê xo 17 serrîyo zindan de ro bi birîna zerê xo marê qesî kena û vana çewerê zindanan abo. Mercan Gerçek wîna va: “Ma vanîme ke endî bikewime meydanan û çare nê çîleyê ma rê bivênime. Newroz seweta ma zaf muhimo. Sewbîn çareyê ma çino. Her çî zaf wayo. Zulim, neheqîye zafa. Ma game erzenîme ma benê erzenê cezaevî. Lajê mi 17 serrîyo cezaevîde ro. Ez sey anayê de kale vana endî beso. Şarê ma endî bikewo meydanan û ma dima heqa xo şime û ju çare bivênîme. Meydanê Newroze meydanê heqe yo. Nayera Newroze seweta ma zaf muhima.”
“Kokimê ma, cînî û ciwamêrdê ma pêro îtaderîme”
Elîf Akbayire zî bi zero weş Newroze ma pêrûne kilmekî wîna pîroz kena: “Newroze ma xêrlî bo, ma rê pîroz bo.”
Cinîya Dêrsimije Dîleke zî coşê zerê xo wîna ard zîwan: “Roja Newroze ma ameyîme tehet ke pîya şayîye virazime. Adetê şarê mayo. Ayera gêncê ma, kokimê ma, cînî û ciwamêrdê ma pêro îtaderîme.”
Lajê Xatûn Çelebîye zî zindan de ro. Wazena ke gonî vindo pêro dayîkî biresê domanê xo: “Newroz xêr bo hetanû peynîye xêr şêro. Newroz aştîye bîyaro, aştîye wazenîme. Domanê ma pêro pîya bixelesîyê ra. Lacekê mi zere (hepis) de ro ma wazenîme ke ef bêro. Pêro bixelesîyê zere ra pêro bivecîyê.”
Fîdan Çelebîye pê çekûyê de kilmê omidê zerê xo dana tewer: “Cenabê Xizirî timî timî nîya rojanê rindan bîyaro.”
Fîlîz Gulmez zî vana “Newroze xêr ameyo. Newroze bimbarek bo. Newroz haştîye bîyaro. Zere weşîye biyaro, bereket bîyaro. Newroz azadîye bîyaro. Newrozê ma pîroz bo. Herkesî rê xêr bêro.”
“Bi xatirê nê rojan ma linganê xo serderîme”
Ma vanîme pêro pîya hetê jubinîde bime. Qaytê jubinî bikime, destanê jubinî bigime. Ma bizanime ke weşîye esta. Nê çekû fekê Sevîm Saglame ra yenê war. Sevîm Saglame wîna dewam kerd: “Na roje sade yê ma nîya yê kulîneya. Yê şarê ma kullîneya. Zavê ma zêçê ma pîrê ma kokimê ma mayê ma ewroj roja ma kulîne ya. Yê ma teyna nîya. Na zî vatena Sevîm Sağlame ya: Na roje de ma venga jubinî danîme, vanîme pêro pîya hetê jubinîde bime. Qaytê jubinî bikime, destanê jubinî bigime. Ma bizanime ke weşîye esta, warîye esta, gulî estê, çîçegî estê, ma estîme, mayê ma pîyê ma estê, kalik û pîrikê ma estê. Bi nî rojan ma linganê xo serderîme. Wazena ke milletê ma pêro pîya kulî bêro hetê jubinî. Sade naye vana. Na roje zaf rojê de delala, zaf rojê de gula. Çike roje roja maya. Dewanê ma de gul û sosinan kerdo ya. Ma gerê qîmetê na roje bizanime. Qîmetê jubinî bizanime. Na roje şarê marê xêrlî bo.”
“Aştîye bibo, rindîye bibo, azadîye bibo rûyê ma hûno”
Dayîka Altûne zî ajansê ma rê maneyê Newroze maneyê prosesê tezeyî nîya ard ziwan “Mi gore Newroz wayîna, birayîna, haştîya, pîyabiyayena, azadîya. Nameyê nî prosesê neweyî çino. Xwezika ju nameyê xo bibîyêne. Eke dewlete ancîna neheqîye nêkero ez înam keno ke hêstirê çimanê mayan vindo. Aştîye bena. Vengê sîlan vindeno. Kes endî deja domanan nêvêneno. Ma têde terba herkesî azad ciwînîme. Hetanû nika ma binê basqî de bîme. Şarê ma ra însanî zerê cezaevî de rê, hemserekê şaredarîyanê ma, endamê meclîsanê şaredarîyane ma, hevalê ma, sîyasetçîyê ma, cîranê ma zerederê. Tabî ke hetanû yê zeredebê zerê ma rehet nêkeno. Aştîye bêro. Herkes agêro keyê xo. Riyê dayîkan û bavikan bihuyo. Awa çiman biqedîyo, gonî biqedîyo. Hetanû kotî nîya şono. Xora dinyade şerî estê şaro sîvîl qir beno, domanî qir benê endî beso. Welatê de gonî nêrişîyo.
Aştîye bibo, rindîye bibo, azadîye bibo. No pero ke şerî rê zayî beno eke aştîyerê zayî bo ekonomîyê ma zî beno rind. Ma cinî, ma mayî tenê nefes gênîme. Keyeyê ma de rûyê ma hûno.”
