Îlhame Ehmed ard ziwan ke Konferansê Neteweyî yê Cinîyan ê Kurdan ê Rojawanî seba Konferansê Neteweyî yê Kurdan ê Rojawanî zemînêk amade kerdo û vat ke mabênê partîyanê sîyasîyan ê kurdan de do îtîfaq bêro kerdene.
Bajarê Qamişloyî yê Rojawanî de 23ê adare bi şîarê ‘Yewîya Neteweyî ya Kurdan serkêşîya cinîyan ê kurdan de yena kerdene’ Konferanso 1. yê Cinîyan ê Kurdan ê Rojawanî ame kerdene.
Beşdaranê konferansî ra Hemsereka Heyetê Têkilîyanê Teberî yê Rojawanî Îlhame Ehmed û Endama Koordînasyonê Helebî yê Kongreya Starî Nêrgize Bekir konferansî ser o ANFyî rê qisey kerd.
Îlhame Ehmed vist vîrî ke prosesêkê winayênî de no konferans zaf muhîm o û vat: ‘’Konferans de her kesî bi hawayêkê azadî fikrê xo vat. Cinîyê kurdî hê serkêşîya nê prosesî kenê. Her gama Rojawanî parçeyanê Kurdîstanî yê bînan de do biba gamêka tarîxîye.
Cinîyê kurdî bi serran o têkoşînêkê bêemanî kenê. Cinîyan bedelî dayî, şehîdî dayî. No konferans netîceya têkoşînê cinîyan o û tarîxê kurdan de do bibo rîpelêko newe. Cinîyî do bi wesîleya nê konferansî rêxistinîya xo xurtêr bikerê, ameyoxê xo awan bikerê û serkêşîye bikerê. Konferansê Neteweyî yê Cinîyan ê Kurdan ê Rojawanî eba Konferansê Neteweyî yê Kurdan ê Rojawanî zemînêk amade kerd. No konferans bibo wesîle ke mabênê partîyanê sîyasîyan ê kurdan de do îtîfaq bêro kerdene. Seba ke şerê zereyî yê Sûrîye bêro astengkerdene îtîfaqê kurdan zaf girîng o.’’
Nêrgize Bekir bale ante ser ke konferans de nîqaş ameyo kerdene ke cinîyî do senî tewrê ameyoxê Sûrîyeya newîye bibê. Nêrgize vat: ‘’Her fikr nîşaneya hêzê cinîyan o. Cinîyî bi nê fikran xo rêxistin kenê, têkoşîn kenê û îradeyê xo eşkera kenê. Bi têkoşînê cinîyan kurdî do yew bibê. Têkoşînê Rojawanî ganî serkêşîya cinîyanê pêroyê Kurdîstanî do bikero.
Bi têkoşînê cinîyan ê kurdan ê Şorişê Rojawanî seba caardişê yewîya cinîyan ê kurdan qewimîyayîşê neweyî do virazîyê. Seba Qanûnê Bingeyî yê neweyî yê Sûrîye fikr û yewîya cinîyan ê Rojawanî zaf girîng ê. Cinîyî do bibê wesîleya vilabîyayîşê neteweya demokratîje û azadîperwerîye, yewîya kurdan û paradîgmaya neteweya demokratîke.’’
