Kongra Star derheqê qerarê cezaya dardekerdişî ya vera Pexşan Ezîzî û Werîşe Mûradî eşkerayî daye û venga rêxistinanê mîyanneteweyîyan da ke hemverê na ceza de wurzê.
Kongra Starî ya Kantonê Firatî derheqê qerarê cezaya dardekerdişî ya hemverê çalakîkeranê kurdan Pexşan Ezîzî û Werîşe Mûradî eşkerayîyêk daye.
Eşkerayî Meydanê Jina Azad a Kobanê de hetê endama Kongra Star Meysûn Kawarî ra ame wendiş.
Eşkerayî de wina ame vatiş: “Çend rojî ra ver Mehkemaya Berze ya Îranî qerarêk da; qerarê dardekerdişî yê hemverê her di çalakîkeranê kurdan Pexşan Ezîzî û Werîşe Mûradî bi îdiaya serewedaritişê çekdarî yê hemverê dewlete û grûbanê bînan reyde girêdayîşî her di çalakîkerê kurdî raştê îşkenceyê fîzîkî û psîkolojî ameyê. Sewbîna serdayîşê keyeyê înan zî ameyo qedexekerdene û destûr nêdayo ke înan rê avûkatêk bêro girewtiş ke înan bipawo.
Seke yeno zanayene hemraya ma Pexşan Ezîzî sey çalakîkera komele Vakur û Rojhelatê Sûrîye de xebitîyayêne û paştî dayêne kênekanê ke DAÎŞ’î ra ameyêne xelasnayene, kerdêne. Werîşe zî sey çalakîker xoverdayîşê Kobanê de cayê xo girewtbî, hemverê terorê DAÎŞ’î têkoşînêko bêhempa dayêne.”
Kongra Star eşkerayîya xo de cezaya dardekerdişî şermezar kerd û venga pêro rêxistinanê mîyanneteweyîyan, rêxistinanê heqanê merdiman û komeleyanê mîyanneteweyîyan da ke nê cezayanê dardekerdişan bîdê betalkerdene.
