Endamanê Meclîsê Ciwanan ê DEM Partîye Sultan Yorulmaz û Azad Ozer destnîşan kerdê ke seba azadîya Rayberê Şarê Kurd Abdullah Ocalan 1ê Nîsane de meşêk danê destpê kerdenê û wina vatê: “Ma do têkoşînê xo bi azadîye tacîdar bikê.”
Endamanê Meclîsê Ciwanan ê DEM Partîye do mabenê 1 û 4ê Nîsane de bi dirûşmê “Em bi civaka demokratîk re ber bi azadiyê ve dimeşin” meşêkî bivirazê. Ciwanan do 1ê Nîsane de sifte derheqê meşî de Warê Şêx Seîdî de beyanatêk bidê û dima zî ver bi dewa Amarayî ya Xelfetî dest bi meşî bikerê. Do bi seyan ciwan 4 rojan bimeşê, ciwanê ke Amed ra do bivejê, do qezayê Sêwreg, Hîlwan û Xelfetî ra bi lingan bimeşê û 4ê Nîsane de zî biresê Amarayî. Endamê Meclîsê Ciwanan ê DEM Partîye Sultan Yorulmaz û Azad Ozer derheqê meşî de qise kerdê.
‘Rol û mîsyonê ciwanan zaf avzel o’
Endama Meclîsê Ciwanan Sultan Yorulmaz bal ant ser vengdayîşê Rayberê Şarê Kurd Abdullah Ocalan û wina va: “Vengdayîş serî de seba cinîyê ciwan seba heme dinya zaf manedar bî. No ser zî herême de coşêkî zaf bi cîya ame cuyayîş. Rol û mîsyonê ciwanan zî ewta de zaf avzel o. Ma barêko gird gênê ser mîlê xo û hetanî Amarayî meşîyenê. Armancê ma yê tewro gird azadîya fizîkî ya Rayberê Şarê Kurd Abdullah Ocalan o. Ma veng heme cinîyê ciwan û ciwanan kenê ke wa beşdarî meşî bibê û azadîye tacîdar bikerê.”
‘Seba azadîya Rayberê Şarê Kurd meşîyenê’
Endamê Meclîsê Ciwanan Azad Ozer zî destnîşan kerd ke seba azadîya Rayberê Şarê Kurd Abdulalh Ocalan ê no meş dayî destpêkerdene û wina domna: “Wa ciwan, dayîk, şarê ma yê kurd hetkarî bidê înan. Ma veng ciwanan kenê ke wa seba azadîya Rayber Apo beşdarî no meş bibî.”
