Sîyasetmedar Feleknas Uca derheqê mesajo ke Abdullah Ocalan semedê êzidîyan ser o şirawito de qisey kerd û va: “Êzidîjan na mektube bi keyfweşî pêşwazî kerd. Rayber Apo mîyanê çar dêsan de esîr ameyo girewtiş. Lê fikriyetê netewa demokratîkî sey koyê Şengalê mîyanê ma de bî.”
Rayberê Şarê Kurdî Abdullah Ocalanî badê pêvînayîşê 27ê Sibate yê heyetê Îmraliyî dir dima, vengdayîşê ‘aştî û komelê demokratîkî’ kerdibî. Badê nê rojên vîyarte de Abdullah Ocalanî semedê komelê êzidî mesajêk şirawitibi.
Sîyasetmedara kurde Feleknas Uca derheqê mesajî de Jinnewsî ra qisey kerd.
‘Şengalî hema xo bîyaye nêkerdo’
Feleknas Uca dîyar kerd ke Rayberê Şarê Kurdî yê Abdullah Ocalanî semedê şarê êzidî zaf muhîm o û va: “Ma qalê na mektube bikerê, seke Birêz Ocalan mîyanê çar dêsan de nêbo, seke koyê Şengalî de mîyanê cimeatê êzidîyan de bi û şahidîya fermanê 73ine kerdibi. Mektubêke winasî şirawitibi. Ez na mektube muhîm vînena. Rêber Apo verê zî qalê rêxistinkerdişê cimeatê êzidî kerdibî. Eke cimeatê êzidî xo rêxistin nêkerê, fermanan ra derbaz benê. 2007ine de Gir Hizer Siba Şêx Xiddir ê Şengalî qirkerdiş ame kerdiş. O wext zî birêz Ocalanî venga cimeatê êzidî kerd ke xo rêxistin bikerê. Ma mesajê Rayber Apo fam nêkerdibî. 2014ine de zî qirkerdiş ame ciwîyayîş. Pêro dinya şahidîyê nê fermanî kerd. Ewro ma ewnîyenê hema rewşa bi hezaran cinîyan dîyar nîya. No trajedî dewam keno.”
‘Berpirsyarî keweno milê êzidiyan ser o zî’
Feleknas Uca tewr peyîn wina vat: “Ma 27ê Sibate de kelecanêk pîl ciwîyayî. Vengdayîşê komelê demokratîkî ame kerdiş. Nê vengdayîşî de berpirsyarî keweno milê êzidiyan ser o zî. Ma xo nê vengdayîşî de berpirsîyar vînenê. Ma do berpirsyarîyê xo bîyarê ca. Rayber Apo qalê tarîxî keno, qalê fermanê ke ameyê ciwîyayîş û badê ci keno. Qalê rêxistinbîyayîşê êzidiyan keno. Nê semedî ra ma xo berpirsîyar vînenê. Badê mektube ra cimeatê êzidî do semedê ameyoxê xo xoverdayîş û têkoşînê xo pîl bikero. Mesajê Rayber Apoyî do cimeatê êzidî rê serkêşî bikero.”
