Parlamenterê DEM Partî yê Rihayî Omer Ocalan dîyar kerd ke Rayberê Şarê Kurdî Abdullah Ocalan hedîseyanê Sûrîyeyî nêzdî ra taqîb keno û wina vato: “Ma nê qebul nêkenê. No sey tarzê IŞÎD’î yo.”
Parlamenterê DEM Partî Omer Ocalan ke Rayberê Şarê Kurdî Abdullah Ocalan reyde Girawa Îmraliyî de pêvînayîş kerdo, dîyar kerd ke pêvînayîşî de hedîseyê ke Sûrîye de qewimîyenê, rojevê înan de bîyê.
Parlamenterê DEM Partî yê Rihayî Omer Ocalanî Ajansa Mezopotamya rê derheqê pêvînayîşî de qisey kerd.
‘Ganî heq û hûquqê elewîyan bêrê pawitene’
Omer Ocalan derheqê detayanê pêvînayîşî de nê çîyî vatî:
“Ma tayê çîyî yewbînan reyde pare kerde. O babeta Rojawanî de serwext o. Vera qirkedişanê elewîyanê Nusayrîyan zaf bi hêrs o û wina vat: “Ma nê qebul nêkenê, çîyêko winasîn nêbeno. Ma qirkerdişê vera elewîyan qebul nêkenê.” Dima mi ra persa ‘Çend kesî ameyê qetilkerdene?’ Mi vat 2 hezarî ra vêşêr kesî ameyê qetilkerdene. Ey wina vat: “Gedeyî, cinî…Kam bêro înan ver qetil kene. No sey tarzê IŞÎD’î yo. Ma nê qebul nêkenê. Ganî heq û hûquqê elewîyan bêrê pawitene. Ganî heq û huqûqê elewîyanê Nusayrîyan bêrê pawitene. Ganî heq û huqûqê Durzîyan bêrê pawitene. Eşkenê sey sîstemê ke kurdan awan kerde, sîstemanê winasînan virazê. Eşkenê yewbînan reyde têkilî ronê û ganî nê tarzê IŞÎD’î qebul nêkerê.” Ez eşkena vaja ke rayberîya merkezî ya Sûrîyeyî ya nikayîn rexne keno.
