Cinîyanê elewîyan dîyar kerd ke Sûrîye de verba tehlukeyê qirkerdişî de têkoşînê cuya danî û wina vat: “Seba heme şaranê Sûrîye reçeteyê rayberîya xosere ma hêvîyêk o.”
Sûrîye de elewîyî qeraxê şaristanan de ciwîyenî. Çi heyf o ke 8ê kanûna 2024î ra nat elewîyî hetê hêzanê paramîlîter yê HTŞ’yî ra hedef yenê girewtiş. Çend rojî ra ver Weqfê Heysem Mennayî ke merkezê ci Cenevre de yo, raporêk eşkera kerd. Rapor de ameyo vatiş ke tena mabênê 7-9î adare de 25 reyî qirkerdiş ameyo kerdene û nê qirkerdişan de zî 2 hezar û 245 sivîlî cuya xo vîndî kerda. Konseyê Ewleyî yê Neteweyê Yewbîyayeyî zî çend rey sebaa ke qirkerdîşî vinderê veng da.
Tewr peyên peymana mabenê Fermandarê HSD’yî û Hukmatê Sûrîye yê Demkî ra pey qirkerdiş vindertî labelê welatijê elewîyî hema zî binê tehluke de yê. Cinîyanê elewîyan babete ser o ajansê Mezopotamya (MA) rê qisey kerd.
Cinîyêka Lazkîye de ciwîyena û tersî verî ra nameyê xo nêdayo wina vat: “Her ca ra hêriş kerdêne, tecawiz kerdêne, talan û weran kerdêne. Hetta cenazeyanê ma reyde kay kerdêne. Ma waşt domananê xo nê qirkerdişan ra bipawê la ê ameyî domanê ma qetil kerdî. Xozaya ma herimnaye, keyeyê ma rijnayî. Rejîmo nikayin Sûrîye de pergalê xo yê bawerî û dînî bi zor wazeno bido kerdene. No ser şert o ke pergalo demokratîk awan bibo.”
‘Ma tehdît kerdê’
Hewna cinîyêk eşkera kerd ke hêzê paramîlîterî berê înan kutî û ê tehdît kerdê û wina domna: “Hêzê paramîlîterî ameyî ver beranê ma û ma tehdît kerdê. Kuçeyan de xeylê tanq û merdimê bi çekî est bî. Tekbî ardêne, a roje ez zaf tersaya. Sûrîye de verba tehlukeyê qirkerdişî de ma têkoşînê cuya danî. Seba heme şaranê Sûrîye reçeteyê rayberîya xosere seba ma hêvîyêk o.”
