Hemsereka ÎHD’yî ya Pêroyî Eren Keskîn dîyar kerd ke ganî heme partîyê ke Meclîs de yê “heqê hêvî” bigîrê rojeva xo û vat: “Caardişê heqê hêvî lutufêk nîyo, wezîfeyêk o.”
Xeylê sazîyê komelo sîvîl ê Stenbolî ke baro zî tede est ê, 28ê nîsane de eşkerayîyêk daye û waşt ke rejîmê înfazî yê “hepisxane de heta peynî mendişî” bêro bedilnayene û “heqê hêvî” bêro caardene. Hemsereka Komela Heqanê Merdiman ya Pêroyî (ÎHD) Eren Keskîn ke eşkerayî îmza kerde, derheqê “heqê hêvî” de ajansê Mezopotamya (MA) rê erjnayîş kerdî.
‘Heqê hêvî lutufêk nîyo, wezîfeyêk yo’
Eren Keskîn îfade kerd ke “heqê hêvî” lutufêk nîyo, wezîfeyê Tirkîya yo û vat: “Tirkîya Peymana Heqanê Merdiman a Ewropayî îmza kerda û dewletêka ke qerarê DMME’yî yê mecburî qebul kerdê. Nê semedî ra zî dewlete wayîrê wezîfe yo ke ‘heqê hêvî’ bîyaro rojeve û na babete ser o sererastkerdişanê heqdaran vejo orte. Ma zî sey rêxistinê heqanê merdiman, baro, sendîka û rêxistinê weşîye ma hewcedarî dîye ke ma derheqê ‘heqê hêvî’ de eşkerayî bidê.
Eren Keskîn bale ant nê çîyê ser o ke Tirkîya de derheqê binpaykerdişî heqan de pîvanê distandardîye yenê kerdene û vat: “Heqê hêvî û bedilîyayîşê qanûnanê înfazan bi qeraranê meclîsî yenê ca. La çi heyf ke nêzdîbîyayîşê partîyanê bînan Partîya Têduştî û Demokrasîyî ya Şaran (DEM Partî) vêşêr derheqê ‘heqê hêvî’ de cayê rexneyî yo. Heqê hêvî lazimtîyêka huqûqê merdimîye yo. Û ganî heme partî heqê hêvî dekerê rojeva xo. Bi lez ganî na babete de gamî bêrê eştene.”
Eren Keskîn dîyar kerd ke çareserkerdişê meseleyê kurdî de aktoro tewr muhîm Abdullah Ocalan o û vat ke eke Abdullah Ocalan demêko kilm de qadêka azade de fikiranê xo şar, çapemenî û rayedaran reyde pare bikero do proses bi hewayêko hîna bawer de aver şêro.
