Dayîka Hafîze Gur yew zî dayîka tewr qesaba veşnaye ya. 20 laj, kêna, torin û warzayanê a mîyanê doza azadî de têkoşîn dayî û têkoşîn zî danî. 13 ferdanê keyeyî mîyanê têkoşînî de cuya xo dest dayî, Hafîze Gur hetkarîya xo ya pêvajoya newe nîşan da û waşt êdî aştî pê bêra.
Hetkarîyê seba vengdayîşê “Aştî û Komelê Demokratîkî” ke Rayverê Şarê Kurdî Abdullah Ocalan 27ê Sibate de bi rayîrê Heyetê Îmraliyî yê DEM Partî aşkera kerdbî, domyeno. Keyeyanê têkoşînê azadî de bedelanê giran dayê, seba pêvajoya hetkarîya xo anenî ziwan û vengê aştîyêka bi rûmet kenî. Nê keyeyan ra yew zî, keyeyê Gurî ke serranê 90î de qezaya Elkê ya Şirnexî koçberî Wanî bîyî yo. Keyeyê Gurî 13 kesî mîyanê Hereketa Azadî ya Kurdî de cuya xo dest dayî û 5 ferdanê keyeyî zî mîyanê herekete de yê. Her wina 2 ferdanê keyeyî zî nika hepisxaneyî de manenî.
Keyeyî ra 2 kesî hepsî yê
Parlemanaterê Wanî yê verî û Endamê MYK’î yê DEM Partî Nazmî Gur ke 2ê Citmenga 2020î derheqê “Doza Kobanê” bi baxaneyê hetkarîya sucê “xerakerdişê yewîya dewlete” û “sûrkerdişê (tahrik) seba sûcî” ameybî girewtiş, ferdekî keyeyê Gurî yo. Nazmî Gur, nê baxaneyan ra 22 serrî û 6 aşmî cezayanê hepsî girewt û nika Hepisxaneyê Ewleyî ya Berze ya Tîpa F a Hûmara 2. Sîncanî de hepsî yo.
2 rayî keyeyê înan xera kerdê
Sereştişê ewilî yê keyeyê Gurî hîna verê çimanê Hafîze Gure de ganî yo û wina qalê nê rojanî kena: “Gama raya ewilî ameyî û bi ser keyeyî ra eştî, destê mi de Qûran estbî û ez şîya ver berîyê keyeyî. Mi înan ra va; ‘demê vewrî yo, keyeyê ma xera mekerî’ la hewna zî keyeyê ma xera kerdî û şîyî. Mêrdeyê mi payîz de şî qezaye û malzemeyî ardî û ma rayêka bîn keyeyê xo awan kerd. Hewna ameyî keyeyê ma xira kerdî, ma zî nêçare dewe ra vejyayî û ma verê xo da Wanî.”
Hema zî aştî wazena
Hafîze Gure hema zî aştî wazena, vengê aştî dana û Hafîze Gure dîyar kerd ke seba hepsîyanê sîyasî zî efûyêk bêro vetiş û wina dewam kerd: “Ma zî maxdûr ê, nê tirk nê kurd eşkenî yewbînan çin bikerî. No şer tena bi aştîye werte ra hewanîyeno. Bawerîya mi na pêvajo ra est a. Bes o êdî, zilmê înan şî hetanî ser erş û esmanî. Bi îzna Homayî do na pêvajo bi ser kewa. Nê çend serrî yê serekê ma hepsî yo, wa serekê ma veradê û aştîyêka bi rûmet virazî. Ma rayîrê serekê xo de yê, ma peynîya vatişê serekê xo de yê. Waştişê ma veradayîşê serekê ma yo. Serekê ma, serekê temamê Kurdistanî yo, nê çikêkê nê şenikî yo.”
