Hemsereka Konseya Rayberdişî ya KCKyî Besê Hozat vat: “Ma tarîxêko newe nusenê. PKK’yî xora rolê xo kay kerd. Ma do prosesê neweyî nê mîrasê girdî ser o aver berê.”
Hemsereka Konseya Rayberdişî ya KCK’yî Besê Hozata ke kongreya PKK’yî ya peyêne de qisey kerd, sere de Rayber Apo bi heskerdişî selam kerd û Alî Haydar Kaytan û Riza Altun bi heskerdiş, hurmet û mînetî yad kerdî.
Besê Hozat bale ante muhîmîya kongre ser û nê vatî: ”Senî ke Rayberîye zî vat, no qedîyayîş nê, destpêkerdişêko newe yo. Ma hol zanê ke no prosesê bedilnayîşî û xo newekerdişî yo. Eke çew biewnîyo xorîyîya ci ya tarîxî ra çew dahînî hol fam keno. Coka ma atmosferê hîssî ra vejîyenê. Ez bi xo biney nê ciwîyaya.
Raporo polîtîk ê Rayberîye
Rayberîye semedê her kongre raporêk hazir kerd. Xeylê kongre ke ma tewrê ci bîyî, ê raporî ameyî wendene, ê perspektîfan ser o munaqeşeyê kongre ameyî rayraberdene û peynîkerdene. Na kongre de netîceya têkoşînê girdî de rixmê şertanê zoran ê Îmraliyî Rayberîye tewrê prosesî bi û ma wina kongre kenê. Ma reyna raporê rayberîye yo polîtîk sey şansêkî girdî wend. Na kongre zî bi raporê Rayberîye ameye akerdene. Xora no bi têkoşînê xurtî ame kerdene. Ma xeyrê Rayberîye hema payra yê. Rayberîye çend sereyê xo dejna, firkîrya hendê têgêrayîşî aver berd. Çend xo afirna, hendê têgêrayîş newe kerd. Mezgê merkezê îdareyê têgêrayîşî Rayberîye yo.
Rayberîye semedê bedilnayîşî cesaret keno
Na babete de terzê Rayberîye zaf cîya yo. Rayberîye vano mi ‘kilmvateyê 10 serranê peyênan vet. Mi nê des serran de xo newe ra afirna. Bi nê afirnayîşî ez bedilnayîşî kena. Ez semedê nê bedilnayşî cesaret kena.’ Nê raporê polîtkî nê ser o keno. Gama ke vano ez prosesê têkoşînê çekdarî caverdena zî nê besteno ê bedilnayîşî. Nika nê zaf muhîm ê. Çunke ma munaqeşeyanê bedilnayîşî rayra benê. Pêro raporanê polîtîkan ê Rayberîye de, bitaybetî nê raporê peyênî de zî wina yo. Rapor 21 pelan ra yeno pê. Hema hema nêmeyê ci derheqê problemê cinî-camêrdan ser o. No xora xo ser babetêka munaqeşe yo.
Ma do bibê serkêşê nê prosesî
Ma tarîxêkê neweyî nusenê. Tarîx do linganê xo ser bêro roniştene û ma do bibê serkêşê nê. Tarîxê azadîye yê şaran do bêro nuştene. Rayberîye heme heqîqatan vejeno werte û tarîxê azadîye yê şaran reseno heqîqetî û her çîyî linganê ci ser dano roniştene. PKKyî xora rolê xo kay kerd. PKKyî her çîya ver raşta zî morê xo da tarîxî ro. Zaf erjê û manayê girdî afirnayî. Têna hetê şarê kurdî û cinîyan ra nê, semedê heme merdimîye erjê girdî, manayê girdî afirnayî û zerrîya şarî de cayê xo girewt. Na mana de mîrasêk verda. Ma do prosesê neweyî nê mîrasê girdî ser o aver berê. Ma do pêro bibê serkêş û mîlîtanê nê prosesî. Ma mîlîtanîya nê prosesê neweyî zî bikerê. No anorêkê gird o.”
