Seba awankerdox û pêşenganê PKK’yî Alî Haydar Kaytan û Riza Altunî taxa Tuzluçayirî de tezîye ameye ronayene.
Partîya Karkeranê Kurdîstanî (PKK) vizêr encamê kongreya xo ya 12. eşkera kerdbi û dîyar kerdbi ke xo fesih kerdo. Reyna kongre de şehadetê awankerdox û pêşengehanê PKK’yî Alî Haydar Kaytan û Riza Altunî zî amebi dîyarkerdene. Kongre dîyarîya înan ameye kerdene. Eşkerakerdişê şehadetê Alî Haydar Kaytan û Riza Altunî ra pey xeylê şaristananê vakurê Kurdîstan û Tirkîya de rojanê dîyarkerdeyan de do tezîye bêra ronayene. Cayanê tezîye ra yew zî taxa ke Riza Altun tede pîl bîyo, taxa Tuzluçayirê qezaya Mamakî ya Anqarayî ya.
Keyeyan cayanî ke tezîye ame ronayene, fotografê Alî Haydar Kaytan û Riza Altunî aliqna û masa ser o ronayî. Derûdorê fotografan de qerenfîlî ameyê ronayene û mumî ameyê ponayene. Tîya de sînevîzyono ke behsê cu û têkoşînê Alî Haydar Kaytan û Riza Altunî keno, do bêro temaşekerdene. Tezîye do 3 rorî bidomîya. Tezîye do hetê keyeyê Riza Altunî ra bêra rayraberdene.
Derheqê Taxa Tûzlûçayirî de
Taxa Tuzluçayirî hem seba Hereketê Azadîye yê Kurdîstanî hem zî seba herketanê çep ê Tirkîyayî cayêko muhîm o. Zafêrê welatijê na taxe komelê Elewî yê. Welatijê Elewîyî ke serranê 1960î de şaristananê xo ra ameyê û tîya de bi ca bîyê, înan taxe awan kerda. Taxe de her ked xebatkar û karker o. Rayberê Şarê Kurdî Abdullah Ocalanî demo ke Anqara de waneno, o zaf şono taxe û uca de merdiman şinasneno. Kombîyayîşanê ewilan ê komkerdişê grûbe uca de keno û nîqaşanê awankerdişê partîyêk uca de rayra beno.
