Enqere de bi nameyê ‘Festîvalê Kulturî yê Madimakê Sêwazî’ seba ke organîzasyonêko provokatîf ameyo viraştiş, Serekê Pêroyî yê Komela Pîr Sultan Abdalî Cuma Erçeyi reaksîyon nîşan da û vat ke ganî nê pankartê provokatîfî bêrê komkerdiş û na şayî zî bêra betalkerdiş
Şaredarîya Altindagî û Fuarê AKATî bi hemkarî do Baxçeyê Mîlletî yê Enqere de mabênê rojanê 12 û 15ê kanune de bi nameyê ‘Festîvalê Kulturî yê Madimakê Sêwazî’ bivirazê, seba ney zî zaf cayê Enqereyî ra pankartî ameyê elaqnayîş. Heqê babete de Komela Pîr Sultan Abdalî beyanatêk da û welatij Serdar Doganî ke Qirkerdişê Sêwazî ra birîndar xelisyabî hesabê xo yê medyayî ser o reaksîyon da.
Goreyê xebera PÎRHA’yî Serekê Pêroyî yê Komela Pîr Sultan Abdalî Cuma Erçeyî vat ke nê pankartê provokatîfî ke ameyê elaqnayiş, wa bi leze bêrê hewanayîş, seba ke camî, Madimak û Sêwaz eynî fotografî de bikar ardê.
Hunermend Serdar Doganî ke Qirkerdişê Sêwazî ra birîndar xelisyabî, reaksîyon nîşan da û wina vat: “Bi rojanê Sêwazî propogandayê xo domnenê, festîvalê Madimakî virazenê. Kam ke Madimak xo vîr ra kerdo wa berê komela ma ra nêkewo zere. Baxçeyê partîya şima, şima rê bes o.”
