Qirkerdişanê ke tewr zaf tarîx de ca girewto ra yew zî Qirkerdişê Hewlêrî yo. Netîceyê hêrişê bêbextî de nêzdî 80 gerîlayanê PKK’yî yê birîndarî ke nêweşxaneyê Hewlêrî de rakewte bîyê û xebatkarê nêweşxaneyî qetil bîyî.
28 serrî ra ver hêzanê PDK’yî Hewlêr de hêrişê zaf dezgehan kerd ke mîyanê înan de Heyva Sor a Kurdî zî estbî. PDK’yî bi hewayêko wehş hêrişê nêweşxaneyo ke birîndarî tede est bî kerd û qirkerdişêko gird ard meydan. Rixmo ke 28 serrî qirkerdişî ser o ra vîyartî zî, hema zî cenazeyê şehîdan nêdîyayo keyeyanê înan.
Qirkerdişê Hewlêrî senî qewimîya?
Qirkerdişo ke 16ê Gulana 1997î de merkezê şaristanê Hewlêrî yê Başûrê Kurdîstanî de qewimîya, hema zî kerdoxê ci nêamêyê eşkerakerdene. Qirkerdişî ser o ra 28 serrî vîyartî. 16ê Gulana 1997î de hêzanê PDK’yî bi leşkeranê tirkan ke bi nameyê Hêzê Aştîyî herême de wezîfedar bîyî, înan reyde hêriş kerd zaf dezgehan ser o ke Heyva Sor a Kurdîstanî zî mîyanê înan de bî, bi desan kesê bêpawitişî qetil kerdî. Rixmo ke 28 serrî nê qirkerdişê Hewlêrî ser o ra vîyartî, hema zî cenazeyê kesanî ke şehîd bîyî, teslîmê keyeyanê înan nêbîyê. Heta cayî ke cenazeyî tede ameyî definkerdiş zî nêyeno zanayiş.
Sozê xo nêtepişt
Serra 1997î de mabenê PKK û PDK’yî de adirbest estbî û PDK’yî vatbî ke ê vera gerîlayan hetkarîya leşkeranê Tirkîya nêkenê. La PDK’yî sozê xo nêard ca.
Dima ke PDK’yî sozê xo nêard ca, çekdaranê PDK’yî bi awayêko hemwext hem hêrişê nêweşxaneyî kerd hem zî hêrişê Merkezê Pêroyî yê Yewîya Neteweyî ya Demokratîke ya Kurdîstanî (YNDK), Ofîsê Merkezê Kulturê Mezopotamya yê Hewlêrî, Komela Yewîya Cinîyanê Azadan ya Kurdîstanî (YAJK), hêrişê rojnameyanê Welat û Welatê Roj zî kerd û bi çekanê giranan nê dezgehî gulevaran kerdî. Nê hêrişanê serê dezgehan de zaf merdimanê bêpawitişan cuya xo vîndî kerd.
Operasyonê tepiştişî û hepskerdişî yo ke hêrişî ra dima dest pêkerd, bi aşman dewam kerd. Netîceyê hêrişî de 52 gerîlayê birîndarî, xebatkarî û welatijî ke nêweşxaneyî de bîyî, ameyê qetilkerdene. Kesî ke ameyî girewtene zî zafêrî înan ameyê qetilkerdene. Yanî PDK’yî bi hetkarîya Tirkîya pêro pîya nezî 80 kesê bêçekî qetil kerdî.
Seba cenazeyanê xo muracat kerd
Qirkerdişî ra dima PDK’yî cenazeyê gerîlayan û xebatkaranê nêweşxaneyî teslîmê keyeyanê înan nêkerd. Yeno vatiş ke cenazeyê tayê kesanî ke ameyê qetilkerdene, nêzdîyê meydanê teyarayan ê Hewlêrî de ameyî definkerdiş. Merdimê kesanî ke qirkerdişê Hewlêrî de vîndî bîyî û şehîd bîyî û komela Hêvî ya ke seba paştîdayîşê qurbananê şerî, seba dîyayîşê cenazeyanê şehîdan bi serran o muracatê Komîteya Heqanê Merdiman a Parlamentoyê Herêma Kurdîstanî, komeleyanê Heqanê Merdiman û Parlamentoyê Iraqî kerd.
Goreyê eşkerayîyanê keyeyanê şehîdan hema zî çîyêk înan ra çîyêk nêameyo vatene. Tena sozê caardîşê waştişanê înan dîyayo la pratîk de çîyêk nêameyo kerdiş. Bi taybetî PDK’yî na babete ser o qet qisey nêkerdo. Rixmo ke 28 serrî qirkerdişî ser o ra vîyartî zî heta nika PDK’yî cenazeyê şehîdan teslîmê keyeyanê înan nêkerdo û babete ser o çîyêk nêvato.
