Seba kembîyayîşê awa Çemê Firatî, xeylê istasyonê awa şimitişî yê qezaya Reqayî de astengî vejîyenî û xizmetdayîş de zor ancenî, eger ke nêkembîyayîşê awa dewam bikero, do krîzêk bivejîyo.
Hemserekê Îdareyê Awe yê qezaya Reqayî Hisên El Cerceb aşkere kerd ke seba kembîyayîşê awa Çemê Firatî yê qeza de, waranê ziraetî û awa şimitişî de problemî vejîyayî. Awe de reya qirinciye zêdîyaye.
Desteya Enerjîye ya Herêma Vakur û Rojhelatê Surîye, dima ke reya awa Gola Firatî teqriben 6 metreyî kêm bîye, bi eşkerayîyêk qewimîyayîşê felaketêkî yê ke seba kembîyayîşê awa Awbendê Firatî ra virazo, ser o hişyarî daye û seba çareserkerdişê nê problemî çareyî pêşnîyaz kerdî. Deste, eşkerayîya xo de dîyar kerd ke awa Çemê Firatî aşma Nîsane de zaf kêm bîye û no zî tesîrê heme beşan kerd; zey ziraet, heywanweyiye, dorme û awa şimitişî.
Çareserkerdişê problemî
El Cerceb vat: “Zêdetirê hewteyêkî yo ke awa Çemê Firatî bi awayêkê eşkera kembîyaye û no zî tesîrê pakîye û mîqdarê awa şimitişî yo ke şino mehlayan û dewan ser o kerd. Desanê istasyonanê awe yê ke Çemê Firatî ser o yê, şaristan û dewanê ey rê awe danî û goreyê reya awe tayê înan vinderenî û dima reyna dest bi kar kenî. Netîceya Kembîyayîşê reya awe de zî, reya qirinciye ya şebekeyê awe de zêdîyaye û no zî şarî rê bî problem. Seba çareserkerdişê nê problemî îdareyî dest bi xebatanê pakkerdişê şebekeyê awe kerd.”
Îstasyonê bînî hewceyî est ê
El Cerceb vat ke laboratuvarê merkezî yê qeza seba kontrolkerdişê reya qirinciye ya awe ser o şebekeyê awe de gêreno û her roj raporan amade keno û wina domna: “Goreyê raporan, kamca ke hewcedarîya pakkerdişî est a, tîmê eksperî şan de şinî û pak kenî. Ma nêzanî ke rojanê bê pey de rayîr wina bimaneno ya zî nêmaneno. Rayîrê awe ya nika zaf kemî yo. No rayîr astê tewr nizîmî yê xebetnayîşê istasyonan de yo. Qezaya El Hos de 2 turbînî estî, ê zî yê Reyaş û yê Şahirî yê. Başûrê Reqayî de istasyonê Ekêrşî, Kerame, Cideydit El Belediye û yê Meslexî estî û awe şaristanê Reqayî rê danî. Herwîha istasyonê pakkerdişî (parzûnkerdişî) esto û o zî yo serekeye yo. Dormeyê çemî de istasyonê bîra El Heşim, Cizra, Hawî El Hewa û Hiwêcet Ferec estî.”
