Eyşe Efendî îfade kerd ke hêvî qerardarîya înan o yo ke reyna Rayberê Şarê Kurdî Abdullah Ocalanî Kobanî de pêşwazî bikerê.
Verfeka Înîsîyatîfê Azadîya Rayaber Apoyî yê Kobanî Eyşe Efendî derheqê Kampanyaya çarçewaya ‘Ez wazena Ocalan reyde pêvînayîş bikera’ ajansê ANF’yî rê qisey kerd.
‘Rayber Apo Mîyanê komelî de sey destanêk o’
Eyşe Efendî îfade kerd ke ‘Heqê Hêvî’ heqêko rewa yo la demo ke mesela bena Rayber Apo, ma vînenî ke sîstemê îşkenceyî aver o. Eyşe Efendî dîyar kerd ke bi serran o na mesela derg bîya û wina vat: “Rayber Apo sey tarîxêko newe û destanêk o mîyanê komelî de. Na destane zî mîyanê dewletanê îqtîdarî de sey tersêk bi. Îqtîdar fikranê Rayber Apoyî ra terseno. O semedî ra ne keye ne zî avûkatê Rayber Apoyî nêeşkenê ey reyde pêvînayîş bikerê. La şarê ma zî seba azadîya fîzîkî ya Rayber Apoyî çi welat de û çi teberê welatî de xoverdayîşêko bêemsal mojna.”
Eyşe Efendî îfade kerd ke rixmê vengdayîşê şar û azadîwaştoxanê dinyayî yê seba azadîya fîzîkî ya Rayber Apoyî CPT bêveng o û wina vat: “CPT çend reyî şi Rayber Apo reyde pêvînayîş kerd la tu eşkerayî nêda. Detayê pêvînayîşî nêdayî. Rayberê ma destpêkê wisarî ame dinya, emrê ma zî pîl bîyo, ma bîyê keyeyê şehîdan, porê ma zî êdî sipî bîyo. Ma zî êdî wazenê ke Rayberê xo bivînî, seba ke bi fikranê Rayberê xo ma resayê serkewtişî.”
‘Dem ameyo ke ma Rayberê xo verar bikerê’
Eyşe Efendî dîyar kerd ke ganî êdî ê Rayberê xo hetê fîzîkî de zî yewbînan bivînî û vat: “Nê demanê peyênan de ewil Omer Ocalan, dima ra Heyetê Îmraliyî Rayberê ma reyde pêvînayîş ameyê kerdene. La êdî dem ameyo ke ma zî Rayberê xo bivînê. Dem ameyo ke ma Rayberê xo verar bikerê. Ma pawitêne ke Rayberê xo demê mesajê ey o 27ê sibate de bi vîdeo Rayberê xo bivînayêne la çi heyf ke ma Rayberê xo nêdi. Senî ke Rayberê ma reya ewile verê xo da Kobanî, ma reyna paweyê Rayberê xo yî ke ma reyna ey Kobanî de pêşwazî bikerê û ey verar bikerê. Ma hêvîdar î û ma do hêvîya xo zî teqez bikerê.”
