Kongreya Komela Edebîyatkaranê Kurdan do 31ê Gulane de virazîya. Nuştox Alî Ozgeno ke komîsyonê amadekar ê kongre de ca gêno, veng da û vat: “Bêrê ma pîya kera bidê kera ser o.”
Komela Edebîyatkaranê Kurdan / Komeleya Wêjekarên Kurd 31ê Gulane de kongreya xo virazena. Nuştox Alî Ozgeno ke komîsyonê amadekar ê kongre de ca gêno ajansê ma rê qisey kerd.
‘Kamî çi xebate kerda ma a xebate erjîyaye vînenê’
Alî Ozgenî seba amadekerdişê kongre wina vat: “Komela ma Komela Wêjekaranê Kurd a û peynîya aşma gulane de kongreya xo newa virazena. Verê na kongre ma yew komîsyon viraşto, nê komîsyonî de terba mi 8 kesî ca gênê. Seba amadekarîya kongre no komîsyon karê xo keno û heta roja ke kongre bena a roje karê xo dewrê kongre keno.
Seba beşdarbîyayena na kongre ma verê xo resna endamanê xo û fikrê înan girewt. Aye ra dima nê endamanê ma nameyê kamî wesêna ma, kam no derheq de zanaye yo, kar û xebatê xo est ê, ma xo resna ci û înan de qal kerd, ma goşdarîya înan kerde. Ma vatena xo înan ra vanê, ê zî persanê xo ma ra persenê. Ma ser o qal kenê, tayê vanê ‘ez wazena nê karî de ca bigî,’ tayê embazî benê endam, tayê embazî nas û dostanê xo yê ke nê gureyî ser o kar kenê, nameyê înan danê ma. Wina wina ma xo resnenî vajoranê xo. Kamo ke eşkeno mîyanê na komele de yew kera bido kera ser o, a bîne zî embazanî ke heta ewro yew xebat kerda, ma ê xebatanê înan erjîyaye vînenî.”
‘Ma ganî bêrê têhet’
Alî Ozgenî wina domna: “Ma ra ver na xebat heta yew merhale ameya. Naye ra dima kesî ke nê karî de ca gênê, bi tecrubeyê xo bi zanayîşê xo rayberîya nê karî de ca bigê û bieşkê tayêna avêr berê. Ma wazenî ke na xebate wa vera rindîye şêra. Seba naye zî ma çi bikerî daha rind o. Ma naye ser cat kenîme. No derheq de kam ça de beno bibo, sazîyan de beno, mekteban de beno ma şinê înan de zî seba edebîyatê/vajora kurdî qalî kenê. Eke ma na cematî de ca gênê ma ganî bêrê têhet. Her kes her karî nêeşkeno bîyaro ca, hema her kes ke bêro yew ca pîya eşkeno zaf çîyan virazo. Na kongreya edebîyatkaran/vajoran seba naye zaf avzel a.
Ma sey komîsyonêk vengdayîşê xo her kesî rê kerd. Ma yew mesaj yew eşkerayî zî vila kerde. Ma na xebere heme weşananê medya de vila kerd. Kesî ke elaqadarê ma xo resna înan.
Raşta xebata ke ma pêrûne heta nika kerda, ma a xebate rind vînenê, torin vînenê la belê ma vanî ke ma tayêna na xebate berê aver.”
‘Ma wazenê miletê ma wa avêr şêro’
Alî Ozgenî vatena xo ya pêyêne de seba beşdaranê kongre venga edebîyatkaranê kurdan da û wina vat: “Ma gêrenê yew merdimo ke ma vajî no derheq de nuşteyê ey est ê bivênê û bîyarê têhet. Seba ehlaqê ma seba rumetê ma seba edebîyatê ma vatişê înan est ê. Ma vajê şîîrê înan est ê, ma vajê estanekê înan est ê, ma vajê mertawalê înan est ê, milqetikê înan est ê, ma vajê vateyê verênan hetê înan de est ê, ma vajê şano de, sînema de çi avereyena înan est a, ma aye wazenê vejê meydan. Ma wazenê wa nê kesî bêrê xo tîya de zelal bikerê. Xebatanê xo şarê ma rê, însananê ma rê vila bikerê. Weşanan de rey rey vejîyeno vanê ‘Kam sey milet avêr de ya?’ Vanê ‘O mileto ke wendişê inan vêşî ya o millet aver de yo.’ Ma zî wazenê miletê ma wa avêr şêro. Hetê rojnamegerî de, hetê şano û sînema de, hetê edebîyatî de hetê nuştoxîye de avêr şêro. Ma çirê na komele de xebat kenê? Ma wazenî ke karo ke ma kenê tehm bido însananê ma. Eke şarê ma yew vate ra yew nuşte ra yew şîîre ra yew xebere ra çiqas tehm bigêro, hendê nêzdî yeno.
Ma heme kesî ke nê xebatan reyde eleqeder ê dawet kerdê, kesî ke ma xo nêresnayo ci, a zî kemanîya ma ya, ma wazenî ê zî bêrê daxil bibê.”
