Endamê Komela Edebîyatkaranê Kurdan Mahmut Gulecan va ke şarê kurdî azadîya Rayberê Şarê Kurdî Abdullah Ocalanî paweno. Gulecan dîyar kerd ke ganî Ocalan fikranê xo hîna zaf eşkera şarî rê vajo û fikrê Ocalanî bi hawayêko lezûbez bêrê caardene.
Vengdayîşê “Aştî û Komelo Demokratîkî” yê Rayberê Şarê Kurdî Abdullah Ocalanî 27ê sibata 2025î de amebî eşkerakerdiş. Badê nê vengdayîşî zî PKK’yî adirbest îlan kerd û mabênê tarîxanê 5 û 7ê gulana 2025î de Kongreya xo ya 12. viraşte û 12ê gulana 2025î de xo fesih kerd. Her çiqas ke Abdullah Ocalan û PKK’yî nê gamê muhîmî eştî zî, dewlete hema zî gamêka eşkera nêeşta.
Endamê Komeleya Edebîyatkaranê Kurdan Mahmut Gulecan qerarê PKK’yî û gamnêeştişê dewlete ser o ajansê ma (AW) rê qisey kerd.
Mahmut Gulecan va ke 27ê sibate seba kurdan û pêro netewanê binkewteyan sey “destpêkêko newe” vîneno û wina va: “No hewayêko newe yê têkoşînî yo û yew vurîyayîşê muhîm o. Bi taybetî zî seba ke vurîyayîş Rojhelatê Mîyanênî de yo, zehmet o. Roşnvîran ganî nê prosesê ser o de vinderê, miyanê şarî de çalak bê û no qonax hem bi vatişanê xo hem zî bi şert û mercanê prosesî şarî rê îzah bikerê.”
Rolê roşnvîran û averberdişê demokrasî
Gulecan dîyar kerd ke demokrasî xo bi xo tekîya komelî ya û dewlete averşîyayîşê aye asteng kenî û wina domna: “Çira neteweyî ke demêkî pîya bi aştî ciwîyayêne, sey ermenî, asûrî, kurdî, turkmenî û erebî, nika yewbînan reyde şer kenê. Ganî ser nê cîyayîyan de bifikirî ke nê cîyayîyî eslen est î yan dewlete înan virazena. Roşnvîrî bi taybetî zî êyî ke nuştox î, ganî vera nê parçebîyayîşî nêrazîbîyayîşêko xurt nîşan bidê û zîhnîyetêko demokratîk aver berê. Roşnvîran berpirsîyarîya xo ya prosesî ser o ke Ocalan dayo destpêkerdene, tam fehm bikerê û bîyarê ca.”
Gulecan eşkera kerd ke roşnvîran qewetê xo kokê komel, kultur û ziwananê komelî ra gênê û qiseykerdişê xo wina domna: “Her roşnvîr berpirsîyarê komelê xo û komelan o. Coka roşnvîrî ganî hîna zaf çalak bibê, vera hêrişanê nîjadperestî, desthilatdarî û şerê taybetî tay qeyde de bê û komelî hişyar bikerê. Şarê kurdî hema zî binê tehlukeyê qirkerdişî de yo. Bi taybetî zî ziwan û kulturê înan binê hêrişêko girdî de yo. Rewşa ewroyêne ganî rind bêra qiymetkerdene û ser o rind bêro vindertiş.”
Pawitişê gamanê dewlete û girewtişê aramî
Gulecan vengdayîşê Ocalanî sey “manîfestoyê demokrasî” pênase kerd û wina domna: “Badê vengdayîşê Ocalanî PKK’yî kongreya xo viraşte û qerarê fesihkerdişê xo girewt û heme xebatî seba demokratîkbîyayîşî ameyê kerdene. Şar dewlete ra gamêk paweno û meclîs de qiseyê awankerdişê komîsyonêkî benê. O roşnvîran ra vano ke ganî fikranê xo yê awankerdeyî de bi beşdarîya xo, nê komîsyonî aver berê û gamê lezûbez bêrê eştene. Kurdîstan, Tirkîya û Rojhelatê Mîyanênî hîna aramî pawenê û her çiqas ke pawitişê şarî yo aştîya xurt o zî, gamê dewlete hêdî yê. Ganî heme sazî û dezgehî rol û mîsyonê xo bîyarê ca û hîna zaf beşdarê çalakîyan bê.”
Waştişê caardişê heqan û serbestveradayîşê hepsîyan
Gulecan gamenêeştişê dewlete rexne kerd û eşkera kerd ke qerarê Mehkemeya Destûrî û Mehkemeya Heqanê Merdiman a Ewropa (DMME) derheqê heqê hêvî de ganî bi lez bêrê caardene û wina îfade kerd: “Astengîyê ziwanê kurdkî ser o ganî bi lez bêrê wedarnayene û qet nêeşkeno ke hepsîyanê nêweşan hepisxaneyan de bigîro. Rewşa înan a weşîye xirab a û înan tena xo bi sereyê xo nêeşkenê biciwê. Nê meseleyê ser o de bazarî nêbena. Zaf merdimî bêsebeb hepisxanenan de yê. Qanûnî ke est ê, bi taybetî zî vera kurdan zaf tund ê û zaf heqanê merdiman binpay kenê. Seba ke mîyanê komelî de bawerî ameyo viraştene, nê gamê ganî sey gamê verênî bêrê eştene. Her çiqas ke ziwan de hişyarîyêka pozîtîfe est a zî, o hêvîdar o ke komîsyonêk bêro viraştene û gamê hîna xurtî bêrê eştene. O pêro komelî, roşnvîran vano ke ma kêm vanî û kêm kenî.”
Gamê avzel yê seba Ocalanî û rayîrê aştî
Gulecan peynîya qiseykerdişê xo de va ke komel azadîya Rayberê Şarê Kurdî Abdullah Ocalanî pawena û wina qedêna: “Komelê kurdî û komelê Rojhelatê Mîyanênî ganî hîna aştî bîyarê. Seba na yewe zî, Ocalan ganî hîna zaf fikranê xo komelî rê eşkera vajo, hîna zaf komelî de bêro asayîş û vurnayîşî ke Ocalan fikirîyeno, ganî bi lez bêrê caardene. Seba na yewe dewlete ganî gaman bierza. Her kes na yewe paweno. Her çiqas ke tayê pêvînayîşî benê zî û heyet şono û yeno zî na yewe kîfayet nêkena. Na yewe fîkaranê komelî zêdinena. Ganî averşîyayîş bibo û merdimî qet hêvîya xo ya aştî vîndî nêkerê. Ocalan na dewa de gamêka zaf muhîme eşta. Ganî ma wayîrê na game vejîyê. Seba ke hewn û xeyalê têkoşînan bêrê ca, ganî ma nê hêvîyan mîyanê komelî de xurt bikerê û bi ca bîyarê. Na zî berpirsîyarîya roşnvîran a.”
