Hemsereka Pêroyî ya DEM Partî Tulay Hatimogullari ya ke Kombîyayîşê Cinîyan ê Îdareyanê Herêmîyan ê Demokratîkan de qisey kerd û va: “Ma bawer kenê ke demokrasî do bêro na herre. Na herre de azadîya cinîyan do bêro caardene.”
DEM Partî Kombîyayîşê Cinîyan ê Heyetê Îdareyanê Herêmîyan ê Demokratîkan ke do di rojî dewam bikero, Merkezê Kongre Çand Amedî de kena. Hemsereka Pêroyî ya DEM Partî Tulay Hatimogullari û Hemsereka Pêroyî ya DBP’yî Çîgdeme Kiliçgun Uçar zî tewrê kombîyayîşî bîyî.
Hemşaredara Şaristanê Girdî ya Amedî Serra Bucak ard ziwan ke cinîyî serkêşîya înşayê komelê demokratîkî kenê û vat: ”Coka ma zanê ke heme waranê xizmetî dî bi nê perspektîfî şima xebatan rayra benê. Ma cinîyî rehat nêameyî nê rojan. Heme cinîyan ke semedê nê rojan bedel da ma înan anê vîrî.”
Hemsereka Pêroyî ya DEM Partî Tulay Hatimogullari zî bale ante qeyûman ser û nê vatî: “Bi nê qeyûman yeno waştene ke hem vera heqê vîjnayîşê kurdan hem zî vera temsîlîyetê cinîyan, hemserekîye darbeya girde bêro kerdene. La ma rixmê qeyûman peyde game nêeşte, ma mîyanê şarî de xebatê xo domnayî. Her vîjnayîş de ma hêzê xo kerd dilab, rixmê heme zextan rayîrê xo rê dewam kerd. Ma tîya ra reyna vanê ke nê rojanê ke qala haştîye û komelê demokratîkî yena kerdene de, gerek qeyûm bêro qedînayene. Wa her kes karê xo bikero, walî û qaymeqemî şirê karê xo ser û hemşarêdarî karê xo bikerê. Têna şaredarîyan de nê Baroyê Îstanbulî, Yewîya Tabîban, zanîngehan û xeylê cayanê bînan de qeyûmî ameyî cakerdene. Ma do çirey qeyûman qebul mekerdê.”
Tulay Hatimogullari wina qedîna: “Şaredarîyanê ma karê zaf muhîmî kerdî. Cinîyan destê xo nê şaristanan rê. Reyna şîdetê serê cinîyan karê muhîmî ameyî kerdene. Şaredarîyanê ma xebatê ke cinîyan genê merkezê xo kenê. Komelo demokratîk yeno manaya heme şarî seyyewînî azad biciwîyê. Şaristanê ma bibê dost keyeyê heme şaran. Cinîye azad bê, xizmetê ziwanê dayîke bibo, şîdetê vera cinîye, xoza, doman û biqedîyo. Semedê nê xebata sîstematîke hewce kena. Gerek qet kesêk vêşan memano. Xora berpirsîyarîye parlamento de ya. Tewr verî gerek qanûnê wedaritişê qeyûman bêro vetene û îdareyê herêmî bêrê xurtkerdene. Rayîrê komelê demokratîkî tîya ra ravêreno. Ma bawer kenê ke demokrasî do bêro na herre. Na herre de seyyewbînîya cinîye û camêrdan û azadîya cinîyan do bêro caardene.”
Kombîyayîş çapemenîye rê qefilnaye dewam kerd.
