Amed de raporê binpaykerdişanê heqanê ê 20 zîndanan ame eşkerakerdene. Kombîyayîş de ame waştene wa heqê hêvî bêro caardene, tepişteyê nêweşî bêrê veradayene û verê îşkenceyî bêro girewtene.
Amed de hetê Baroyê Amedî, Komeleya Huqûqnasan ê Semedê Azadîye, Komaleya Heqanê Merdiman û TUAY-DER’î ra bi kombîyayîşêkê çapemenîye raporê binpaykerdişanê heqan ê 20 zîndan ê Amed, Xarpêt, Erzîngan û Erziromî ame eşkerakerdene.
Verê eşkerakerdişê raporî bale ameye antene tecrîdê serê Rayverê Şarê Kurdî Abdullah Ocalan ser ame waştene ke wa cade heqê hêvî bêro şuxulnayene.
Goreyê raporî tepişteyî dekewtiş û vejîyayîşê zîndanî de raştê cigêrayîşanê bêexleqan yenê, tepişteyê ke cigêrayîşê rûtî red kenê raştê muameleyê xirabî yenê. Reyna wextê muayeneyî de leşkerî nêvejîyenê teber, caardişê kelemçeyanê çutan, wesayîtanê rîngî de zaf pawitişî heqê weşîye binpay keno. Hetê bînî di kesî yew ranza de manenê, werdê yew kesî danê hîrê kesan, şertê hîjyenî nînê caardene, awe kêm a,kantîn de tim zem beno. Mektubê kurdkî yenê astenkerdene, kitab û kovarî yenê destsernayene.
Rapor de ame waştene ke wa îşknece bêro qedînayene, tepişteyê nêweşî serbest bêrê veradayene, cigêrayîşê bêexleqî bêrê qedînayene, personelê weşî bizêdîyo, mekanîzmayê çimdarîye yê xoserî bêrê ronayene. Reyna ame waştene ke wezîfedarê zîndanî ke goreyê huqûqî tênêgerenê wa derheqê înan de tehqîqet bêro destpêkerdene.
