Serekê Meclîsî Nûman Kurtulmuşî bale ant vengê Abdullah Ocalan û kongreyê PKK’yî ser o û va: “Nika berpirsîyarî kewena mîlanê TBMM’yî ser o.”
Serekê Meclîsî Nûman Kurtulmuşî Meclîsî de bi Serekê Pêroyî yê MHP’yî Devlet Bahçelî reyde ame têhet. Têhetameyîş nêzdî 25 deqeyan dewam kerd û dima Kurtulmuş û Bahçelî eşkerayîyêka hempare daye. Kurtulmuşî dîyar kerd ke ê derheqê prosesê ewroyîne de qisey kenê. Kurtulmuşî dewamî de va ke badê vengdayîşê Rayberê Şarê Kurdî Abdullah Ocalanî û qeraranê kongreyê PKK’yî nika Tirkîya dest bi prosesêko newe kerd. Kurtulmuşî dewamî de va: “Seba ke no proses bi hewayêko eşkera, çimanê şarî ver de û senî ke ameyo plankerdene aver şêro û bireso encamî, nika berpirsîyarî kewena mîlanê TBMM’yî ser o.”
‘Hewce yo komîsyon bêro awankerdene’
Kurtulmuş bale ant gaman ser o ke Meclîsî de ganî bêrê eştene û va: “Ganî Meclîsî de komîsyonêk bi beşdarîya heme partîyanê sîyasî bêro awankerdene û no komîsyon prosesî taqîb bikero, kontrol bikero û rayberî bikero. Ez hêvîdar a ke Meclîs nê berpirsîyarîyanê xo yê tarîxîyan bîyaro ca û bi hewayêko tewr baş encam bikero. Demêko de ke herême de vurîyayîşê girdî vejîyenê meydan, firsendêko tarîxî kewt destê Tirkîya. No firsend zî berpirsîyarîyêka giran sîyasetî ser o roneno. Na prosesêko winasîn nîyo ke partîyêka sîyasî tena bi serê xo bîyarê ca. No problemê dayîşûgirewtişî nîyo. Ez hêvîdar a her kes destê xo fîno binê kerra û berpirsîyarîyanê xo bîyaro ca. Û binê kontrolê Meclîsî de bi muzakereyan no mesele temam bibo. Tîya de berpirsîyarî ya Meclîsî ya. Ez veng dana partîyanê sîyasî ke hemparê nê berpirsîyarîyan bibê.”
Kurtulmuş persê “Gelo komîsyon do bêro awankerdene yan ney? Şima derheqê na meseleyî de qisey kenê yan ney?” wina cewab da: “Bêşik ma pîya erjna. Derheqê şeklê xebata Meclîsî de ma qisey kerd. Do rojanê vernîyan de bêro zelalkerdene û ma do şeklê xebata Meclîsî raya pêroyî reyde pare bikerê.” Seba persê “Gelo komîsyon do verê tatîlî bêro awankerdene yan ney” zî va: “Do demêko zaf kilm de bêro awankerdene.”
