Amed de 31ê Gulane de bi pêşengîya TJA do meşêk bêro viraştene. Parlamenteranê Dem Partîye Berîtane Guneşe û Sebahat Erdogan Saritaşe cinîyî dawetê meşî kerdî û dîyar kerdî ke meydan de do vengê cinîyan berz bibo.
Hereketa Cinîyan ê Azadan (TJA) do 31ê Gulane de Parkê Şemsê Allakî ra heta Meydanê Şêx Seîdî bi sernameyê “Seba Aştîyêka Komelkî û Çareserîyêka Demokratîke Cinîyî Meşîyenê” meşêk bikero. TJA, DBP û DEM Partî seba meşî amadekarîyanê xo domnenê. Her roje tax bi tax gêrenê û şarî dawetê meşî kenê. Parlamenteranê Dem Partîye Berîtane Guneş û Sebahat Erdogan Saritaş Ajansê Welatî rê qisey kerd û şar dawetê meşî kerd.
‘Bêrê meşî, vengê aştîye berz bikerê’
Berîtane Guneşe dîyar kerd ke 31ê Gulane seat 16.00î de Parkê Şemsê Allakî ra heta Meydanê Şêx Seîdî seba aştîye cinîyî meşîyenê û wina va: “Ma şarê xo dawetê meşî kenê, bêrê meşî vengê aştîye berz bikerê.”
‘Bêrê vengê xo bidê vengê ma’
Sebahat Erdogan Saritaşe dîyar kerd ke ê cinîyî wayîrê vengdayîşê Aştî û Komelê Demokratîkî vejîyenê û wina qisey kerd: “Vera asîmîlasyonî, vera şîdetê serê cinîyan û vera asîmîlasyonê kultur û ziwanê ma, ma bi waştişê cuyêkê paştîdayox û pîyakî meşte Parkê Şemsê Allakî ra heta Meydanê Şêx Seîdî meşîyenê. Ma veng danê heme cinîyan, bêrê vengê xo bidê vengê ma û hêzê ma xurt bikerê. Ma waştişê aştîye bi vengêko berzî û bi hêzêko girdîî Meydanê Şêx Seîdî de berz bikerê.”
