Sîyasetmedaranê kurdan ê surgunkerdeyan bale ante mesuldarîyanê dewlete ser û îfade krd ke seba ke firsendê haştîye destî ra nêşoro ganî azadîya Rayber Apoyî bêra caardene.
Sîyasetmedaranê kurdan ê surgunkerdeyan derheqê vengdayîşê Rayber Apoyî, firsendê haştîye û yewîya kurdan de ajansê ma rê qisey kerd.
Hemserekê Merkezê Komelê Demokratîkî yê Kurdan (NAV) ê Berlînî Huseyîn Yilmazî vat: “Seba çareserîya meseleya kurdan û haştîyêka mende gama tewr muhime azadîya Rayber Apoyî ya. Vengdayîşê Rayber Apoyî û Kongreya PKK’yî seba haştîye firsendê tarîxî yê. Ganî şarê kurdî têkoşînê xo yê demokrasîyî bidomîno û yewîya neteweyîye aver bero.”
‘Verê veran ganî tepişteyê nêweşî û sîyasîyî veradîyê’
Sîyasetmedar Abdullah Demîrbaşî vat: “Vengdayîşê Ocalanî ser o feshkerdişê PKK’yî gamêka tarîxî ya. Heta nika dewlete vatêne ‘heta ke çekî nêrê bêvengkerdene ma do gaman nêerzê’, nika na bahaneya ci zî werte ra wedarîyaya. Verê veran ganî tepişteyê nêweşî û sîyasîyî veradîyê, Meclîs de komîsyonêk bêro ronayene û seba haştîye gamî bierzîyê. Muzakereyan de muxatabo sereke Birêz Ocalan o. Seba ke o bieşko prosesî îdare bikero ganî azad bibo.”
‘Waştişê ma yo zelal azadîya Ocalanî ya’
Tornê Şêx Seîdî û sîyasetmedar Hasan Basrî Firatî zî vat: “Naye ra pey mesuldarîye milê dewleta tirke de ya. Ma hêvî kenê ke hukmatê AKP-MHP’yî sozanê xo bîyaro ca. Waştişê ma yo zelal azadîya Ocalanî ya. Çike o eşkeno şarî îqna bikero û prosesê çareserîya sîyasîye bi lezî bikero.”
‘Vengdayîş seba yewîya kurdan firsendêko tarîxî yo’
Endamê KNK’yî yê Brîtanya û Akademîsyen Mîthat Îshakî zî vat: “Vengdayîşê Birêz Ocalanî seba yewîya kurdan firsendêko tarîxî yo. Paradîgmaya ke Birêz Ocalanî pêşnîyaz kerda seba kurdan, Kurdîstanî û dîaspora xerîtayêke pêşnîyaz kena. Yewîye her wextî ra zafêr lazim a.”
