Fîlozofanê serekan ê felsefeya hemdeme ra filozof Catherine Malabou îfade kerd ke qerarê feskerdişê PKK’yî semedê prosesê newe ra înşakerdişî gama cesûr a û vat, “Ocalan rayberêko polîtîk o ke ez ci rê hurmet kena, gerek bibo azad.”
Fîlozofanê serekan ê felsefeya hemdeme ya fransizan ra filozof Catherine Malabou derheqê vengdayîşê Rayber Apoyî de ajansê ma rê qisey kerd. Qiseykerdişê Catherine Malabou ra qismêko kilm wina yo:
“Sey xeylê kesanê bînan mi zî wextêkê kilmî verî eşnawit ke PKK’yî xo fes kerdo. Na game zaf cesûr a, hêvî dana, rayîr akena. Ez sey kesêka hetê haştîye de ya bi nê qerarî keyfweş bîya. Seke mi mesajê xo de zî vat gerek na geme sey gamêka erjanê yê teslîmîyetî nêro famkerdene. Ez hêvî kena ka na geme paştî bido prosesê demokratîkbîyayîş û naskerdişî. Ocalan rayberêko polîtîk o ke ez ci rê hurmet kena û heyranê ci ya. Çunke bitaybetî serê Bookchin (Murray Bookchin) ra ma derheqê babetanê ekoloji û sîyasetî de seyyewbînî fikiryenê. Ez wazena ke o bibo azad. Têna waştişê mi o yo ke eke zîndanî ra vejîyo, hol bêro pawitene.
Paradîgmaya Ocalanî de famê demokrasîya ke nasnameyanê şexsî ya da komelkî rê hurmet kena est o. No nizdîbîyayîş zaf muhîm o. Yanî kurdî nasnameyê xo vînî nêkenê, no demokrasî azadîya perûne paweno. No proseso etîk yê newe ra înşakerdişî yo. Her gama ke semedê haştîye yena eştene etîk a. La hetê bînî ra eke têkoşîn zaf bêro fatisnayene no zî verê teqayîşî keno a. Nê semedî ra no preses gerek wina bêro rayaberdene ke nasnameyê her kesî rê hurmet bêro kerdene.
Ez hêvî kena ke feskerdişê PKK’yî beno destpêkerdişo newe. La no têna pabesteyê kurdan nîyo, gerek hukmatê tirkî cewabê ci bido. Semedê mi no destpêkerdişêko newe yo. Noprosesêko di het o. Qerarê feskerdişî yê PKK’yî têna eke Tirkîya de îlkeyê demokratîkî bêrê caardene, beno bimana. Belka ez xelet a la goreyê mi waştişê kurdan hetê komelê mîyanneteweyîyî ra nînê eşnawitene.
Bitaybetî fîkrê azadîya cinîyan ê Ocalanî nuqtayêka zaf muhîm a. Femînîzmê kurdan her kesî xo rê heyran verdeno. Bitaybetî cinîyê Rojawanî semedê pêro cinîyan modelêk ê. Tecrubeyê Rojawanî raşta zî zaf muhîm o. Ez reyna vana ke ez heyranê têgêrayîşê cinîyan ê kurdan a, ez paştî dana înan. Çîyê ke ê pawenê semedê nê herêmanê dinya zaf muhîm ê.”
