Fîlozof Prof. Michael Lowyî dîyar kerd ke fikrê Rayberê Şarê Kurdî Abdullah Ocalanî seba têgêrayîşanî ke têkoşînê komelkî kenê, eşkenê bibê çimeyê îstîfadekerdişî û ê îlham danê.
Fîlozofê marksîstî Prof. Michael Lowyî derheqê Vengdayîşê Rayberê Şarê Kurdî Abdullah Ocalan, qeraranê Kongreya PKK’yî û qewimîyayîşanê peyênan de ajansê ANF’yî rê qisey kerd.
Michael Lowyî pare kerd ke çend hewte verê cu o Amed de bîyo û dîyo ke seba prosesê aştî hêvîyêk est a. Lowyî vat: “Her kes pabeyê gamanê îqtîdarê AKP’yî yo. Erdoganî heta nika seba prosesî gamêka zelale nêeşte. Hema zî girewteyê sîyasî yê kurdî zîndan de yê.”
Lowyî bale ante qeraranê Kongreya PKK’yî ya 12. Ser o û vat: “PKK’yî vengdayîşê Ocalanî ser o qerararê çekronayîşî da û xo fesih kerd. Xora PKK garantî wazeno ke bieşko tewrê cuya sîyasî û komelkî ya Tirkîya bibo. PKK’yî fam kerdo ke bi têkoşînê çekdarî do nêreso cayêk. Ney de heqdar o. La bê garantî fesihkerdiş aqilane nîyo. Ganî Tirkîya cewabê bida ney.”
Lowyî îfade kerd ke paradîgmaya Rayberê Şarê Kurdî Abdullah Ocalanî verê kapîtalîzmî de eşkena biba hêvîya alternatîfî. Lowyî vat: “Rojawan de modelê paradîgmaya Ocalanî yeno caardene. No model û paradîgma îlham danê têgêrayîşanê bînan ê dinya. Fikrê Rayber Apoyî seba têgêrayîşanî ke têkoşînê komelkî kenê eşkenê bibê çimeyê îstîfadekerdişî.”
