Alî Ocalan ke roşan de şibi xalê xo Rayberê Şarê Kurdî Abdullah Ocalanî zîyaret kerdbi, wina vat: “Xalê mi vat: “Ma tîya de cuyêka newa awan kenê.” Alî Ocalan vat ke Abdullah Ocalanî gedeyan rê qeleme dîyarî kerda.
7 û 8ê hezîrane de bi munasebetê Roşanê Qurbanî Hepisxaneyê Tîpê F ê bi Ewlekarîya Berze ya Îmrali de pêvînayîş ame kerdene. Rayberê Şarê Kurdî Abdullah Ocalanî 26 serran ra pey reya ewile gedeyan reyde ame têhet. Pêvînayîşî de lajê waya ey Fatam Ocalan Alî Ocalan, tornê aye Ronahî Arjîn (10) û Dîlan Arîn Ocalan (11) û birazayê ey Parlamenterê DEM Partî Omer Ocalan beşdarê pêvînayîşî bi. Pêvînayîş di saetan dewam kerd.
Alî Ocalan derheqê pêvînayîşî de Ajansê Mezopotamya (MA) rê qisey kerd.
Reya ewilîne şi ey het
Alî Ocalanî dîyar kerd ke bi serran o waştişê pêvînayîşî keno û roşanî ra çend rojî ver ey telefon ameyo ke waştişê ey qebul bîyo. Alî Ocalanî wina vat: “Tewr peyên Serok (Abdullah Ocalan) vat ke o wazeno maya mi zî bivîno. Labelê maya mi riyê nêweşî û seba ke erebeya astengdaran de ya, bêyî refaqatê kesekî nêeşkena şêra. Mi zî seba ke biba refaqatê aye muracat kerd. Rojêk avûkatî ra telefon ame û vat ke waştişê ma qebul bîyo. Ma hetêkî ra keyfweş bîyê, hetêkî ra zî xemgîn bîyê. Ma hisê têmîyan ciwîyayî. Ez 5o serre ya do reya mi reya ewil Serokî bivînayêne.”
Fatma Ocalan riyê nêweşîya xo ra nêşîye
Alî Ocalan dîyar kerd ke maya ey Fatma Ocalan nêweş bîya o semedî ra înna qerar dayo ke aye xo reyde nêberê pêvînayîşî. Alî Ocalan kênaya xo Ronahî, birazaya xo Dîlan û Parlamenterê DEM Partî Omer Ocalanî reyde ver bi Îmrali kewtê rayîr.
‘Gedeyan rê qeleme dîyarî kerd’
Dewamê qiseykerdişê xo de Alî Ocalanî da zanayene ke Gemlîkî ra raywanîya saetêkî ra pey bi ferîbote resayê Girawa Îmrali û demêk ameyê vindarnayene û dima ey berdê salona pêvînayîşî. Alî Ocalan qiseykerdişê xo wina domna: “5-20 deqîqeyan ra pey ma vîyartê salone û dima Serok ame. Ma ey lingan ser o pêşwazî kerd. Roşanê ma pîroz kerd û silam da ma. Ey 26 serran ra pey reya ewile gedeyî dîyî. Gedeyan reyde eleqedar bi, ê maçî kerdî. Înan ra pers persayî. Înan ra persa ka şonê dibistan yan nê. Qeleme dîyarî înan kerd û înan ra vat ‘biwanê.’ Ronahî ra persê ‘Ti biwana, ti wazena biba çi?’ kerd. Ronahî zî vat ‘Ez wazena biba avûkat.’
Xo ser o û çalak bi
Mi ra rewşa Riha û Xelfetî persa. Rewşa partîya me ya Xelfetî persa. Tayê dewe û merdimê ma persa. Merdimê ma yê ke cuya xo vîndî kerda, ardê xo vîr. Vat, ‘ê seba ma bi nirx ê.’ Merdim, dewij û şarê Xelfetî rê silamî erşawitî. Vat, ‘her kesî ke persê mi kerd, silamanê mi înan rê vajê.’ Mi ey xo ser o û çalak dî. Vat, ‘Ma tîya de cuyêka newa awan kenê, rewşa ma ya winasîne est a.’ A xoserbîyayîşê ey û çalakbîyayîşê ey xeylê hêz da ma. Bi hêvî bi, bi kelecan bi. Vat, ‘ez ciwan a, xo ser o ya. Ez xo ra baş ewnîyena.’ Rewşa gedeyanê mi persa û dima ma xatir waşt û pêvînayîş qedîya.”
