Stenbol de di aşman de 93 kesî bi manayê akerdişê fotografanê Abdullah Ocalanî, vatişê sloganê “Bijî Serok Apo”, girewtişê govende û parekerdişanê medyaya dîjîtale ameyî destbendkerdene. Înan ra 4ê ci gede, 24 kesî ameyî girewtiş. Rixmê qerarê AYM’yî ke vano na slogane suc nîya û dewlete muzakereyan de Rayberê Şarê Kurdî Abdullah Ocalanî reyde qisey kena zî, polîsî hêrişê çalakîyan kenê û ciwanan destbend kenê.
2014î de Amed de Merve Nur Tekîne rê bi nê manayê ceza ameybî dayene. AYMyî 2024î de na ceza betal kerd û aşkera kerd ke “azadîya xoîfadekerdişî” ameya binpaykerdene. Labelê vera nê qerarî zî polîsî her çalakî de anons kenê ke na slogane vera qanûnî ya û tehdît kenê.
Pîrozkerdişanê Newroze de 81 kesî ameybî destbendkerdene
Yenîkapî de Newroze bi coşêko pîl ameye pîrozkerdene. Dimayê pîrozkerdişê Newroze polîsan eşt keyeyan ser û 4 operasyonan de 81 kesî destbend kerdî; nê kesan ra 4 kesî gede, 24 kesî ameyî girewtiş û 30 kesî zî bi kontrolê edlî ameyî veradayene.
Pîrozkerdişê rojbîyayîşê Ocalanî de 3 kesî ameybî destbendkerdene
5ê nîsane de Platformê Sazgehanê Demokratîkan bi munasebetê rojbîyayîşê Rayberê Şarê Kurdî Abdullah Ocalanî Qeraxê Kanarya de seyrane organîze kerdbi. Seyran de fotografê Rayberê Şarê Kurdî Abdullah Ocalanî ameyê akerdene. Polîsan hêrişê welatîyan kerdbi ke fotografê Ocalanî nêrê mojnayene û 3 ciwanî bi îşkenceyî destbend kerdê.
Pîrozkerdişê 1ê gulane de 2 gedeyî zî tede 5 kesî ameybî destbendkerdene
1ê Gulane de fotografê Rayberê Şarê Kurdî Abdullah Ocalanî ameyî akerdene û sloganê “Bijî Serok Apo” ame vatene. Polîsan hêrişê ciwanan kerd û 2 gedeyî zî tede 5 kesî destbend kerdî. Di gedeyî Qereqolê Kadikoyî de binê îşkenceyî de mendî û vat ke polîsan ê erdî ra kaş kerdê û paşkulan reyde dayo înan ro.
Rayîrşîyayîşê ‘Gamêk seba aştî’ de 4 kesî ameybî destbendkerdene
16ê gulanede bi pêşengîya DEM Partî rayşîrşîyayîşêk amebî organîzekerdene. Dimayê rayîrşîyayîşî 4 ciwanî ameyî destbendkerdene û polîsan veng da 26 ciwanan ke bêrê îfade bidê. Dewlete bi nê qedexeyan wazena fikranê Rayberê Şarê Kurdî Abdullah Ocalanî Stenbol de sînordar bikera, labelê şar her kuçe de wayîrveajîyayişê xo mojneno.
‘Slogan û posterî yenê krîmînalîzekerdene’
Raybera Komela Huqûqnasanê Seba Azadîye (OHD) Bêrîvan Barîn na babete erjnaye û wina vat: “Dewlete hetêk ra prosesanê aştî de Ocalanî reyde pêvînayîşan kena, hetêk ra zî merdiman seba na slogane destbend kena. Nakokî zî tîya ra vejîyena orte. Qerarê AYM û MHME’yî zaf zelal ê. Seba ke vatişêk bêro cezakerdene, ganî o vatiş şîdet biwazo. Tena vatişê slogane bi sereyê xo nêbenu suc.”
‘Qerarê AYM û MHME’yî yenê binpaykerdene’
Bêrîvan Barîn dîyar kerd ke aşmanê peyênan de qerarê AYM û MHME’yî bi hawayêko teng yenê şuxulnayene û vat: “Dosyayan de herinda şîdetî de slogan, govende yan zî parkerdişê medyaya dîjîtale sey delîl yenê mojnayene. Parekerdişê sîyasî yan zî îdeolojîkî tena bi sereyê xo nêeşkenê bibê manayê girewtişî. Rixmê qeraran zî destbendkerdiş û girewtişî dewam kenî; no zî binpaykerdişê azadîya raman û xoîfadekerdişî yo.”
