Rayedaranê Pawitişê Sivîl ê Xezayî eşkera kerd ke roja çarşeme artêşê Îsraîlî sîvîlan ser o guleyî varnayî ke seba girewtişê hetkarîye rêz de bîyî û tewr kêm 31 kesî ameyê kiştene û 200 kesî zî birîndar bîyî.
Goreyê eşkerayîya Rayedaranê Pawitişê Sivîl ê Xezayî; korîdorê Netzarimî de vera girseya şarî gulebaran ame kerdene. Ame zanayene ke şar ver bi merkezê alîkarî yê sazgeha bi nameyê gaza Humanitarian Foundation (GHF) ra şîyêne.
Verfekê Pawitişê Sivîl Mahmûd Bassal eşkerayî daye AFP’yî û vat: “Bi tank û hacetanê hewayî yê bêmerdiman bi hezaran sivîlan ser o guleyî ameyî varnayene ke nê sivîlan waştêne werd bigîrê.”
Goreyê Bassal bi hezaran Filîstînijî şewe kom bîyê, seba ke bieşkê xo biresnê merkezê hetkarîye yê GHF’yî. Serê sibayî saete 05:30î de zî bi tankan û bi dronan hêrişêko giran sivîlan rê ame kerdene.
DEM Partî: Şermê merdimîye û tarîxî yo
DEM Partî qirkerdiş şermezar kerd û vat: “Bi hêrişê sivîlanî ke Korîdorê Netzarimê Xezayî de paweyê hetkarîya merdimîye yê, Îsraîlî reyna tena qanûnê mîyanneteweyî nê, eynê wextî de rûmetê merdiman zî binpay kerd.
Gulevarnayîşê şarî mehkûmê vêşanîye ameyê verdayîş, suco tewr pîl ê tarîxî yo. No tena sucê şerî nîyo, eynê wextî de guneyanê tewr hovane yê tarîxê merdimîye yo. Bêvengîya dinya vera na zilmî şermêko pîl o.”
