Deşta Şarezûrî, bincê dare de berhemanê xo yê dewijîyî roşenê. Yew rotoxan ra Mehdî Sidiqî va ke turîstan mîyan de waştişê berhemanê dewijîyan zaf zêde yo.
Helebce û Hewraman de 36 mintiqayê turîstîkî est ê. Turîstî her çar demsalan de şinê nê mintiqayan. Zîyaretê turîstan, seba dewijan beno çimeyê cuyeyî. Dewijî, bi amayîşê turîstan eşkenê berhemanê xo yê dewijîyî biroşê.
Hemwelatijê bi nameyê Mehdî Sidiq yo ke karê fêkî rotişî keno, wina va: “Nê 9 serrî yo ke ez na rayîrê Hewraman-Xurmalî ser o fêkîyanê dewijîan roşeno û karê ma zî no yo. Zaf turîstî nê mintiqa ser o yenê, ma zî berhemanê xo nê rayîran ser o roşenê.”
Sey heme mintiqayan, hukmatê demvîyarteyî yê Herêma Kurdîstanî avzelî nêdano berhemanê citkarê nê mintiqayî û rotoxî vanê: “Çi heyf ke hukmat qet avzelî nêdano berhemanê ma û nêpaweno ke bêrê bazarî.”
Deşta Şarezûrî de zebeş, xoxe, alunçe, saye, bacan, bamya û zaf berhemê bînî yenê roteyene. Seba ke nê berhemî zaf bi tahm ê, turîstî zî zaf nê berheman wazenê û gênê.
Deşta Şarezûrî yew deşta pîl a mintiqaya Helebce ya. Serra de bi desan tewirê berhemê çandî yê cîya-cîyayî yenê roteyene. La seba ke hukmat cotkaran ra paştî nêdano, cotkarî zaf zirar vînenê.
