Serekê Baroyê Amedî Abdulkadir Guleçî ard ziwan ke qarneya heqanê merdiman a Tirkîya zaf xirab a û vat binpaykerdişê heqan pabesteyê meseleya Kurdan ê.
Serekê Baroyê Amedî Abdulkadir Guleçî ANFyî rê qisey kerd. Guleçî vat: ”Çaresernêkerdişê meseleya Kurdan çimeyê binpaykerdişê şaran o. Seba ke nê binpaykerdişê heqan werte ra bêrê wedaritene ganî meseleya Kurdan bêra çareserkerdene.”
Abdulkadir Guleçî bale ante binpaykerdişanê heqan ê herêmanê şerî ser û vat ganî komelê mîyanneteweyîyî hîna zaf bibo hîsgêr. Guleçî kerdişê verên ê grûbanê ke badê rijyayîşê rejîmê Sûrîye îdare fîna dest, vistî vîrî û vat: ”Înan hêrişê gan û malê şarî kerd. Ma hêvî kenê ke komelê mîyanneteweyîyî û hêzê rojawanî cîdî nizdî benê û seba ke sîvîlî zirar mevînê tedbîran genê.”
Abdulkadir Guleçî nê vatî: ”Tirkîya morê xo dayo biney pêkerdişanê heqanê merdiman ê mîyanneteweyîyî ro la zîndananê ci de problemê girdî est ê. 650 tepişteyê nêweşê giranî hema zîndan de yê. Ganî nê helêke cuwa ver bêrê veradayene. Bitaybetî pawitoxê heqan ser o zexto giran est o. Derheqê avûkatan de tehqîqatî yenê destpêkerdene û muhakemerdişî dewam kenê.
Hetê bînî ra derheqê azadîya çapemenîye de problemê girdî est ê. Vera rojanmegeran zext û operasyonî est ê. Xeylê kesî yenê tepiştene. Nê semedî ra ma qerqilîyenê. Çi heyf ke hukm xoser nîyo. Mehkemeyê xoser çînê. Tirkîya qeraranê Mehkemeya Heqanê Merdiman a Ewropa nêana ca. Ma tîya ra veng danê Konseya Ewropa; ganî derheqê nê binpaykerdişê heqan de hîsgêr bê. Qarneya heqanê merdiman a Tirkîya zaf xirab a.
Çaresernêkerdişê meseleya Kurdan çimeyê binpaykerdişê şaran o. Eke ewro rojnamegerî zîndan de yê zafê înan netîceya çaresernêkerdişê meseleya Kurdan a. Xora polîtîkayê tecrîdî yê zîndanan zî pabesteyê meseleya Kurdan ê.Seba ke nê binpaykerdişê heqan werte ra bêrê wedaritene ganî meseleya Kurdan bêra çareserkerdene. Rayîr û metodê nê zî eşkera yê.”
