Serekwekîlê Koma DEM Partî Sezaî Temellî bale ant vengdayîşê Abdullah Ocalanî ser o û vat: “Meclîs êdî qonaxê gameeştişî de yo. Awankerdişê komîsyonî êdî berpirsîyarîya ma ya sereke ya.”
Serekwekîlê Grûba Partîya Têduştî û Demokrasîyî ya Şaran (DEM Partî) Sezaî Temellî derheqê hedîseyanê rojeve de Meclîsî de qisey kerd. Temellî sere de bale ant şerê Îsraîl û Îranî û vendgayîşê vindertişê şerî kerd. Temellî vat ke çareserîya şer û kaosê herême, komelo demokratîk û aştîya topyekun a.
Temellî “Vengdayîşê Aştî û Komelo Demokratîk” ê Abdullah Ocalanî ard vîrî û vat: “No manîfestoyêk o. Kurdan reyde aştî ya Tirkîya de do tesîrê xo aştîya herême ser o bikero. Bi rayîranê demokratîkan çareserkerdişê meseleyê kurdî girêdayeyê rewşa tîya yo. Xelasîya şaranê Filîstînî zî ya şaranê bînan zî tîya ra vîayrena. Bi rejîmanê otorîter ê sey Îsraîl û Îranî nêbeno. Vera nê rîskan yewin hêzê ma aştî yo. Ma reyna vengdanê şaranê Tirkîya û şaranê aye kenê; bêrê paştî bidê vengdayîşê komelo demokratîk û têkoşînê aştîya menda.”
‘Ganî Meclîs bikewo dewre’
Temellî bale ant nîqaşanê derheqê çareserîya meseleyê kurdî ser o û îfade kerd ke ganî meclîs na babete de rol bigîro. Temellî wina vat: “Birêz Ocalan 27ê sibate de vengda û PKK’yî 12ê gulane de xo fesih kerd û çekî ronayî. La dima çîyêk nêbedilîya. Seba ke gamê lazim î bêrê eştene, êdî ganî înîsîyatîfî bigîrê û gaman bierzê. Serekê Meclîsî Numan Kurtulmuşî vat ke do înîsîyatîfî bigîrê. Ganî bi lez bikewê mîyanê têgerî û seba çareserîya meseleyî komîsyonê meclîsî bikewo merîyetî.”
Çareserîya meseleyê kurdî tesîrê Rojhelatê Mîyanênî keno
Temellî dîyar ker dke çareserîya meseleyê kurdî do tesîrê Rojhelatê Mîyanênî zî bikero û vernîya Îsraîlî zî bêro girewtene. Temellî îfade kerd ke ganî Meclîs êdî gaman bierzo û vengda Kurtulmuşî ke bi lez xebatan bido destpêkerdene, înan dawet bikero û komîsyono ke hetê her kesî ra yeno qebulkerdene, awan bikero.
Verenêdayîşê girewteyanê sîyasî
Temellî reaksîyon vera nêveradayîşê girewteyanê sîyasî û nêweşan da û vat: “Ma tîya de behsê aştîya komelkî kenê la kerdişanê ke hepisxaneyan de yenê kerdene, înan ra biewnê. Kerdişanê hepisxaneyanê Bolu û Karabukî ra biewnê. Rêbazê îşkenceyî û xespkerdişê heqan uca de dewam kenê. Mudirê nê hepisxaneyan ne wezîran goşdarî kenê ne serekkomar ne zî tu rayedaran. Goreyê sereyê xo têgêrenê. Her tewir kerdişê îşkenceyî xo rê heq vînenê.”
Krîzê aborî
Temellî dewamê qiseykerdişê xo de bale ant krîzê aborî ser o û vat ke bi rayîrê zam û bacan ameyoxê feqîran yeno diznayene. Temellî vat: “Ez tîya de serekê TUÎK’î rê gere kena. Bi destê TUÎK’î dizdî yena kerdene û serekê TUÎK’î hema zî nê sucî keno.”
Zîyaretê Hepisxaneyê Sîlîvrî
Temellî dima ra zî cewab da persaê rojnamegeran. Temellî da zanayene ke Hemserekê Pêroyî yê DEM Partî Tulay Hatîmogullari û Tuncer Bakirhan seba zîyaretê Şaredarê Stenbolî yê Şaristanê Girdî Ekrem Îmamogluyî muracatê Wezaretê Edaletî kerdo û wazenê roja pancşeme şêrê ey zîyaret bikerê. Temellî dîyar kerd ke hema zî seba muracatê înan cewab nêameyo dayene.
