Sema Yuce ke vera zilmê serê şarê kurdî de serra 1998î de xo veşnabi, serrgêra wefatê xo yê 27. de tirba xo ser o ameye vîrardene.
Sema Yuce ke 21ê adara 1998î de Hepisxaneyê Çanakkaleyî de seba protestokerdişê zilmanê serê şarê kurdî xo veşnabi û 17ê hezîrane de nêweşxane de cuya xo vîndî kerdbî, serrgêra 27. ya wefatê xo de tirba xo ser o ameye vîrardene. Vîrardiş tirba Sema Yuce ser o goristanê dewa Qerxelîxa Corî ya qezaya Dutax a Agirî de ame kerdene. Rêxistinê DBP û DEM Partî yê şaristan û qezayan, keye û xeylê kesî beşdarê vîrardişî bîyê.
Beşdarê vîrardişî ewilî şîyî maya Sema Yuce Zennure Yuce zîyaret kerde. Dima zî şîyî goristanê dewe û tirba Sema Yuce zîyaret kerd. Zennure Yuce riyê nêweşîya xo ra nêeşkaye beşdarê merasîmê vîrardişî biba. Birayê Sema Yuce Fecrî Yuce vîrardişî de qiseykerdişêko kilm kerd û vat: “Têkoşînê azadî û têduştîye bi serran o dewam keno. Qonaxê zaf muhîmî vîyarnayê. Her tim qehreman û pêşengê xo afirnayî. Heval Sema zî qehramana serdemê xo ra yew bîye.”
Yuce da zanayene ke Sema Yuce fikrê “Jin Jîyan Azadî” yê Rayberê Şarê Kurdî Abdullah Ocalanî de wayîrê cayêko muhîm a û vat: “Hevala Sema barêkê giran ê têkoşînê da milanê keye û hemrayanê xo ser o. Bi munasebetê 27. serrgêra şehadetê hevala Sema, ma pêro kesanê ke têkoşînê azadîye de cuya xo vîndî kerda, anê xo vîr.”
Qiseykerdişan ra pey seba kesanê ke têkoşînê azadî û demokrasî de cuya xo vîndî kerda, duayî ameyê kerdene.
