Şerê Îsraîl û Îranî ra pey rayîrê hewa yê Tehranî ame girewtene. Destpêkê şerî ra pey Berê Sînor ê Kapikoyî yê Wanî de qelebalixîyêka pîle virazîyaye.
Hêriş o ke Îsraîlî 13ê hezîrane de vera Îranî dabi destpêkerdene, kewt roja 6. Tesîrê şerî Rojhelatê Mîyanên û xeylê welatan de rojeve de yo. Hêrişan ra pey dewleta Îranî rayîrê hewayî seba sîvîlan girewt. Sînoranê Tirkîya û Îranî de bi taybetî Berê Sînor ê Kapikoyî de Teyaregehê Ferît Melen û termînalanê otobusan de qelebalixîyêka pîle est a. Welatijê Îranî ke riyê şerî ra agêrenê welatanê xo yan zî seba ke Tirkîya ra vejîyê beranê sînorî de girseyê pîlî kewtê dore.
Berê sînorî de problemê vîyartişî
Welatijê Îranî riyê şerî ra seba ke agêrê welatê xo yan zî Tirkîya ra vejîyê mecbûr mendê ke rayîranê bejayî bişuxulnê. Labelê beranê sînorî de problemê pîlî yenê ciwîyayene. Ame dîyarkerdene ke xeylê kesî bi rojan o berê ver de yenê vindarnayene û seba vîyartişê tayê welatijan destûr nêyeno dayene. Welatijî ke Tebrîz yan zî Tehranî ra ameybî Tirkîya, dîyar kerd ke şer cuya înan a rojane ser o tesîr keno û riyê vengê bombardumanî nêeşkenê rakewê. Welatijan îfade kerd ke Tehran de cuya înan her ke şona hîna zaf zehmet bena û semedê ewleyî ra bêçare mendê ke welatê xo ra vejîyê. Welatijanê Îranî dîyar kerd ke rixmê şerî zî do koçberîyêka girde çin ba.
