Qezaya Elkê ya Şirnexî de bi manayê ke seba erdlerzî musaît nîyo, nêweşxane kerdbi dibistanêk. Nêweşxane de seba ke hûmara doktor, personel û melzemeyan kêm ê, welatijî mexdur benê.
Wezaretê Derûdor û Şaristanî serra 2013î de seba Nêweşxaneyê Dewlete yê Elkê yê Şirnexî raporê “Seba erdlerzî musaît nîyo” da. La rixmê raporî zî nêweşxane bi serran ameyo şuxulnayene. Awanîya bi 30 cayan ke serra 2004î de kewte xizmet, seba ke demî reyde rizîyaye, qerar ame dayene ke serra 2020î de bêra rijnayene û nêweşxaneyêko newe bêro awankerdene.
Awanîya dibistane de xizmetê weşîye danê
Erdlerzê 6ê sibata 2023î ra pey ke merkezê ci Mereş bi zî qerar ame dayene ke awanî bilez bêra rijnayene. Qerarî reyde nêweşxane 30ê teşrîna verêne ya 2023î de kerdbi dibistanê qeza.
Her çend kerdbi dibistan zî hema zî uca de sey nêweşxane xizmet dano. La awanîya dibistanî goreyê şert û mercanê xizmetê weşîye nîya. Seba viraştişê nêwşxaneyêko newe Wezaretê Weşîye xeylê reyan îhale akerd û tewr peyên kewt îhale û hezîrana 2024î de dest bi viraştişê ey ame kerdene. Goreyê îhaleyo ameyo kerdene, ganî awanîya nêweşxaneyî êlula 2026î de bêra teslîmkerdene.
Hûmara doktor, personel û melzemeyan zaf kêm a
Nêweşxane de hûmara doktor, personel û melzemeyan zaf kêm a. No zî beno sebeb ke welatijî xoresnayîşê heqê weşîye de mexdur benê. Nêweşê ke rewşa înan giran a sewqê cayo tewr nêzdî yan zî Şirnexa ke 122 kîlometre qeza ra dûrî ya yenê kerdene. Nika nêweşxane de doktorêk seba zayîşî, yew yê dahîlîye, yew yê didanan û 8 doktorê pratîsyenî est ê. Reyna nêweşxane de humara personelan zî kêm a. 8 hemşîreyê ke qadroyê înan nê nêweşxane de yo, bi torpîlê sendîkayanê terefgiran nêweşxaneyê qezayanê Silopîya, Cizîre û merkezê Şirnexî de ameyê wezîfedarkerdene. Nê wezîfedarkerdişî eynê wextî de tayînanê mîyanê şaristanî zî asteng kenê.
Unîteya oksîjenî, klîma û asansor çin ê
Personelan ra vete kemaneya melzemeyan zî est a. Riyê awanîya nêweşxaneyî nika unîteya oksîjenî, klîma û asansor çin ê. Rixmo ke rayberîya nêweşxaneyî Mudirîyetê Weşîye yê Şirnexî ra waştişê personel û melzemeyan keno zî no yan erey yeno caardene yan zî qet nêyeno caardene.
Hûmara ambulansan kêm a
Merkezê qeza Îstasyonê Vengdayîşê Lezgîn ê 112 est ê û nê îstasyonan de tena 3 ambulansî est ê. No zî seba qezayêka ke dewan reyde nufusê aye 14 hezar û 809 kes ê û 31 dewê aye est ê, qêm nêkeno. Seba ke mabênê qeza û Şirnexî de 122 kîlometre yo û rayîrî baş nîyê, rewşanê lezgînan de helîkoptera ambulanse Wan ra yena yan zî helîkopterê leşkerî nêweşan benê merkezê Şirnexî. Riyê çinbîyayîşê doktor û îmkananê kêman xeylê welatijî şonê teber yan zî cuya xo vîndî kenê. Bi nê hewayî heqê xoresnayîşê weşîye yê welatijan yeno binpaykerdene.
