Serekê DYA’yî Donald Trump eşkera kerd ke mabênê Îsraîl û Îranî de “adirbestêko tam û bêkemanî” ameyo îlankerdene û nê reyde do şer biqedîyo. Press TV’yî zî vat ke saete 07:30î ra adirbest dest pêkerdo.
Serekê Dewletanê Yewbîyayeyî yê Amerîka (DYE) Donald Trump platformê Truth Socîalî beyanatêk da û îdia kerd ke Îsraîl û Îranî adirbestêk ser o seba 12 saetan pê ameyê. Trump îfade kerd ke adirbest do mîyanê 6 saetan dest pêbiko û bi nê prosesî do şerê 12 rojan biqedîyo.
Trump parekerdişê xo de vat: “Her kesî rê pîroz bo! Îsraîl û Îran pêmayê ke adirbestêko topyekun û tam eşkera bikerê ke do 6 saetan ra pey dest pêbiko û 12 saetan dewam biko. Na nuqta de do seke şer qedîyayo, bêro qebulkerdene.”
Trump ca nêda detayanê teknîkî yê adirbestî û dîyar kerd ke Îran do adirbestî bida destpêkerdene û 12 saetan ra pey do Îsraîl zî beşdarê nê prosesî bibo, bi nê hewayî do şer bi hewayêko fermî biqedîyo. Trump dîyar kerd ke eke proses bi rengêko serkewte temam bibo do her di hetî zî bi rengêkê ‘aştîyane û hurmet’ têbigêrê û her di welatî seba mojnayîşê “cesaret û aqilîye” pîroz kerdê.
Hetan hema bi rengêko fermî beyanatê Trumpî piştrast nêkerdo.
Wezîrê Karanê Teberî yê Îranî Arakçî: Adirbest nîyo
Wezîrê Karanê Teberî yê Îranî Abbas Arakçi zî dîyar kerd ke Îsraîl reyde hema tu adirbest nêameyo kerdene û vat: “Seba adirbestî û vindertişê operasyonanê leşkerî hema tu pêameyîşêk çin o. La eke Îsraîl tewr erey heta serê sibayî saete 04.00î hêrişanê xo yê vera rejîmê Îranî û şarê ey bida vindarnayene, nê saete ra pey nîtê ma çin o ke cewabdayîşê xo bidomnê. Seke ma xeylê reyan vat, şerî Îran nê Îsraîlî da destpêkerdene.” Arakçi vat ke do qeraro peyên yê seba vindarnayîşê operasyonanê leşkerî dima bêro dayene.
Îsraîl de 6 kesan cuya xo vîndî kerde
Demêko kilm verê eşkerayîye encamê hêrişê fuzeyan ê Îranî de Îsraîl de 6 kesan cuya xo vîndî kerde.
Press TV: Adirbest dest pêkerd
Press TV a Îranî eşkera kerd ke saete 07:30î ra mabênê Îsraîl û Îranî de adirbest dest pêkerdo.
