Alî Koçak terteleyê Dêrsimî de doman beno, merg ra reyîno ra. Yew birayê xo yeno kiştene. Surginê Nîgde benê. Peyde ke yênê dewe wêrana û newe ra awan kenê. Beno 92 reyna yênê dewe kenê tal û adir danê ver. A roje ra hetanî na roje hesretê dewa xo yo.
Alî Koçak (91) terteleyê Dêrsimî de doman beno, merg ra reyîno ra. Yew birayê xo yeno kiştîş. Surginê Nîgde benê. Fexîrîye, xerîbîye û hesretîye ancenê. Ef ke vejîno peyser gêrenê ra yenê Dêrsim. Yênê qayt kenê ke dewe wêrana. Newe ra dewe awan kenê. Hetanî 1992 weşîya xo dewa xo de ramenê. Rojê eskerê tirkî reyna yênê dewe vanê dewe tal bikerê. Eskerî dewe kenê tal û adir danê ver. A roje ra hetanî na roje Alî Koçak suka Dêrsimî de nuşeno ro û dewa xo ra durîyo, hesreta dewa xo anceno.
‘Ma kerdîme trênan ruşnayîme Nîgde’
Alî Koçak emrê xo yê dergî de çi dîyo çi nêdîyo ma rê wina dîyar keno: “Nameyê dewa ma Roşnage bîye. Ez Roşnage de ama dina. Wextê tertelî de ez doman bîyo. Wexto ke esker ame ma vaz da binê kemeran henî xelesiyayîme. Ma dewe de pê guretîme, maya mi pê destê mi girewt ez arda verê kewerî. Terteleyê 38’i de eke esker ame, mîlîsî bî mîlîsî. Di birayê mi bî, tenê nîya ma ra ayrî kewtî bî, eskerî tifangî nayî pira. Bî dirbetin, o ju birayê mi remabî ju kî uca de merdbî.
Ma girewtîme berdîme Nazmîya. Acara ma kerdîme qamyonan berdîme Xarpit. Ma kerdîme trênan ruşnayîme Nixde. Ma teslîme muxtaran kerdîme. Muxtaran kerd bî dore miletî marê non ardêne. Dimera hêgayî dayî ma. Kesî hêgayî nêramitêne. Birayê mi xo rê gurîyêne.”
Peyser agêrayîş
Alî Koçak û keyeyê xo 9 serrî Nîgde de manenê. Eke ef vejîno peyser yenê Dêrsim. Peyser amayîşê xo ser wina qal keno: “Hukmatê menderesî ke awan bî dewî kerdî serbest ma 1947î de peyser gêrayme ra ameyme. Şime dewa xo banî xirabe bî. Cayê pagan belî nêbî. Ma xo rê dês kerdî, hebê ardî pêser tede mendîme. Mal kerd weyî, nîya kerd henî kerd vîyarna ra şî. 1950î ra hetanî 1992 nîya şî.”
‘Ma nîyada ke nêbeno ma xo rê remayme şîme’
Apo Alî terteleyê 38î ra dime yew tertele zî 1990î ra dime vêneno. Seba nî seran zî wina vano: “1992 de tersanê hukmatîra ma caverda şî. Şênê ma veşnê zafêrî veşnê, tayê bi xo rijîyê tayê kî veşnê. Endî ma nîyada ke nêbeno ma xo rê remayme şîme. Ma remayîme, malê xo rot, çîyê xo rot darmadaxan bîme şîme. Kes nêşono endî kes nêşono. Dewa mi kuna ra mi vîrî, mezelê ma ûcarê çayî ma vîrî nêkuyo. Ez beşe nêkeno şorî. Tayê şonê, şonê zîyaret kenê, mezelan çî mî zîyaret kenê, fetelînê yênê.”
