Dêrsimij Huseyîn Yalnizî seba maneyê rojeyê 12 Îmaman ajansê ma rê qisey kerd. “Mordemo Elewî zê Îmam Husênî qarşîyê zulimî de ca gêno. Hetê zulimkarî de ca nêgêno. Coka yêno veşnayene, coka zulim vêneno. Coka yeno qirkerdene. Coka meyîtê xo beno vîndî nêvêneno.
Aşma muharreme seba komela Elewîyan aşmê de pîroz a. Her serre na aşme de 12 rojî rojeyê Îmaman gênê. Seba ke Hz. Husên û 71 kesê hetê î bi destê eskeranê Yêzîdî Deşta Kerbelayî de bê awe dîyê vindartnayene û amê qetilkerdene. No semed ra a roje ra heta na roje seba xatirê Îmam Husên û 12 îmaman Elewî sîya girêdanê û 12 rojî roje gênê.
‘Nê 12 rojan de awe xo ro nêkenîme, nêşimenîme’
Dêrsimij Huseyîn Yalnizî seba maneyê rojeyê 12 Îmaman ajansê ma rê qisey kerd. Huseyîn Yalnizî verî seba nê rojê 12 Îmaman verê yew zîyare de çeraxe fiste ta û gulbanga xo dê. Dimera ma rê wina gisey kerd: “Ma kirmanckî de nê rojî ra ‘Rojeyê 12 îmaman’ vanîme. 12 rojî rojeyê xo gênîme. Nê 12 rojan de awe xo ro nêkenîme. Porê xo, zimêl û herdîşa xo nêgênîme. Goşt nêwenîme û awe nêşimenîme. Kincanê sîyayan kenîme xo ro. Yas danîme girê.
Handê ke destê ma ra ame ma cile de ranêkunîme. Hardî ser ro kunî me ra. Yanê çayê? Ma ezîyet danîme xo. Çike wextê pêxamberan de Îmam Husên ke şehîd bîyo, 12 îmamî ke şehîd bîyê pê ezîyet şehîd bîyê. Ayera gore ma kî ezîyet danîme xo.
12 rojî awe nêşimenîme. Çayê? Wexto ke Yêzîdî kê Ehlîbeytî şehîd kerdê qarşîyê înan de awe şimita pê kêfê xo ardo. Îmam Husênî qarşîyê Yêzîdî de seba awe sare nênano ro. Vato ‘Ma eke biwazim ma rê awe zafa. Wayîrê ma Şahê merdan izne nêdano ke ma a awe bişimime. Ma Kerbela de tefşanîye ver şehîd benîme.’ Rêna kî Yêzîd nêno raye, benê Îmam Husênî sarebirnenê.”
‘Mordemo elewî qarşîyê zulimî de ca gêno’
Huseyîn Yalniz vano Hz. Husênî ra nat elewî timî timî zulim vênenê, hetê dewletan ra yenê qirkerdene. Wina vano “Na Dêrsim qirkerd. Çaya qirkerd? Alewîyê aye ra qirkerdî. Zowbîna çi sucê xo bî? Çar koşeyê dinya de kotî de Elewî est ê ûja de bereket est o. Kotî ke Elewî est o ûja de zulim çin o. Kotî ke Elewî est o ûja de vijdan û meramet est o. Îqrar û îman est o. Ûja jubinî girewtene esta, jûbîyayîş est o. Coka Elewî ra qarînê. Çike mordemo Elewî kotî ke mazlum est o hetê î de ca gêno ayera zulim vêneno.
Selatîn Demîrtaşî ke lewê Erdoxanî de ca bigirewtêne nika zê yardimcîyê cumhurbaşkanî ca girewtêne. Nîyade lewê Erdoxanî de hetê zulimkarî de ca nêgirot nika hepis de ro. Mordemo elewî zî eynîyo, qarşîyê zulimî de ca gêno. Hetê zulimkarî de ca nêgêno. Coka yêno veşnayene, coka zulim vêneno. Coka yenê qirkerdene. Coka meyîtê xo beno vîndî nêvêneno.
Çi qirkerdenî est ê, çi zilm û zor est o têde bi destê dewlete bîyo. Destê zulimî û zalimî ra bîyo. Mordemo elewî kî vano ke ‘Zilim meke. Xirabo zulim meke. Nîya de heq ma ser ra est o. Ça mirê zulim kena yanê?”
‘Sawaş qilêrîya, zulim o’
Huseyîn Yalniz qesa xo wina girêdano: “Ma vanîme rindîye bibo. Xirabîye nêbo. Kes kesî nêkişo. Ez Elewîyo. Raya îmam Husênî, raya Mehemedî ramenîme. Ça şima ma kişenê, qulî kişenê, herb kenê? Mekerê. Milet rind bicîwîyo, domanî bê pî memanê. Domanî memirê. Heq ma ser ra est o. Sawaş qilêro, zulim û qetlîyamo. Milet jubinî ra nêterso rindîye bikero. Rind weşîya xo biramo. Quwete bido jubinî. Ma têde yê ju memleketî me. Tirk, Kurd, Laz, Çerkes, Ereb kes nêmiro qardêşim.”
