Heyeta Ewropî ku ji 39 kesan pêk tê li Stenbolê deklarasyonek eşkere kir. Heyetê di deklarasyonê de banga gavavêtinê li hikûmeta Tirk kir û got: “Ji bo ku pêvajo bigihîje serkeftinê divê birêz Ocalan û hemû girtiyên siyasî tavilê û bê şert û merc werin berdan.”
Heyetek ji 39 kesan ku di çarçoveya kampanya “Ez dixwazim serdana Abdullah Ocalan bikim” di bin sîwana Platforma Aştî û Azadiyê ya Ewropayê (EFFP) de ava bû, daxwaza hevdîtina bi Rêberê Gelê Kurd Abdullah Ocalan re kir. Heyet duh hat Stenbolê û dest bi hevdîtin û danûstandinan kir.
Heyetê îro li oteleke li Taksîmê ya Stenbolê di civîna “Maseya Gilover” de li hev kom bû û nîqaşan kir. Heyetê bi tevî Hevserokê Giştî yê DBPê Keskîn Bayindir ve li otelê daxuyanî da çapemeniyê û deklarasyonek eşkere kir.
Deklarasyona bi Tirkî û Îngîlîzî hat xwendin.
Deklarasyon bi vî rengî ye:
“Mafên gelê Kurd bi awayek sîstematîk di bin zext û êrişan de ye. Gelê Kurd her tim di pêvajoya demokratîk a li Tirkiyeyê tên qewirandin. Em li vir hevgirtina xwe ya bi gelê Kurd re diyar dikin.
Em bang dikin ku rayedarên Tirk têkildarî mizakereyên aştî û diyalogê ya rastî bi hemû aliyên gelê Kurd re gavên şênber biavêjin.
Em banga xwe li hemû gelên Tirkiyeyê, tevgerên pêşverû û partiyan dikin ku ji bo ev pêvajoya aştiyê bigihîje serkeftinê bixebitin.
Bi van angajmanan guhertinek mayînde û dikaribe were birêvebirin pêk were û bi rastî jî wê rêya Tirkiyeyek demokratîk bê vekirin.
Di vê pêvajoyê de, divê Tirkiye erkên xwe yên navneteweyî yên rêzgirtin, pêkanîna û parastina mafên mirovan ên hemû mirovên di nav sînorên xwe de bi cih bîne. Di demeke ku di asta navneteweyî de rewşa bi dijminatî û êrişkariyê ve bêtir tê xuyankirin, derfeteke dîrokî dide ku pirsgirêka Kurd bi rêya diyalog û danûstandinan were çareserkirin. Ev her du hêman bingehên bingehîn ên her civakeke demokratîk in.
Di demekê de ku Rojhilata Navîn di nav agir de ye û gelek welat di pêşbaziyeke çekan a bê sînor de ne, birêz Ocalan yek ji dengên herî xurt e ku aştî û bêçekbûnê li herêmê diparêze. Birêz Ocalan bangeke wêrek û di wextê xwe de kir da ku bêçekbûn û xwefesixkirina çêbibe, ji bo çareseriyeke aştiyane û demokratîk ji bo pevçûnekê ku ji çil salan zêdetir e didome.
Em vîzyona konfederalîzma demokratîk a birêz Oalan û pêşniyara wî ya berfirehtir ji bo Rojhilata Navîn ne tenê ji bo Tirkiyeyê, lê ji bo tevahiya herêmê wekî modelek nas dikin.
Ji bo ku pêvajoya demokratîk bigihîje potansiyela xwe ya tevahî, pirr girîng e ku birêz Ocalan û hemû girtiyên din ên siyasî yên ku mafên wan ên mirovan hatine binpêkirin, tavilê û bê şert û merc werin berdan. Domandina girtina wan fikarên cidî tîne holê. Rêzgirtina mafên mirovan di dema girtinê de pir girîng e. Bi taybetî, tecrîda 26 salan a li ser birêz Ocalan li girtîgeha Girava Îmraliyê û mehrûmkirina wî ya ji mafên wî yên bingehîn bi awayekî neqanûnî pîvanên hiqûqî yên neteweyî û navneteweyî binpê dike.
Wekî komek ji çalakvanên navneteweyî, akademîsyen, siyasetmedar û pisporên mafên mirovan, em bang li hikûmeta Tirkiyeyê dikin ku erkên xwe yên di çarçoveya qanûnên navneteweyî yên mafên mirovan û hiqûqa mirovî de bi cih bîne. Em bang li hikûmeta Tirkiyeyê dikin ku li gorî prensîbên edalet, demokrasî û aştiyê tevbigere.
Em ê çavdêriya gavavêtina hikûmetê bikin û hêvî dikin ku Tirkiye dê bikeve nav veguherînek rastîn ber bi civakek rastî ya demokratîk û berfireh.”
