Awbendê Firatî yo ke kantonê Tebqa de yo, badê ke 7 metre awe depoyê ey ra kemî bîye, nika tehluke de yo ke xizmetî ra vejîyo û no zî vera zîret, enerjî û cuye tehluke yo.
Bi dewamkerdişê kêmîkerdişê averberdişê awa Firatî hetê dewleta tirke ra hetê erdê Sûrîye û Iraqî ra, Awbendê Firatî êdî ver bi vindertişî yo. Desteya Enerjî ya Rojawanî awa ke Gola Firatî de bîye, seba têmînkerdişê lazimtîyanê bingeyî yê şarî xerc kena. No zî bî sebebê ke herême nêzdîyê felaketêko merdimî bêro ke tarîxê herême de çîray nêbîyo û do tesîrê xo heme hetanê ciwîyayîşê şarî yê dormeyê hewza Firatî biko.
Mudîrê Mudîrîyetê Awbendanê Herêma Vakur û Rojhilatê Sûrîye Îmad El Ubêd diyar kerd ke riyê kêmîbîyayîşê girdan ra herîkîyayîşê awe hetê Tirkîya ra hetê Iraq û Sûrîye ra, rêjeya Gola Firatî xeylê kemî bîya. El Ubêd nîşan kerd ke mîqdarê awa ke nika hetê herême ra herîkena vîndî bena, çimkî rêjeya buharbîyayîşî bi tena sereyê xo sanîye de 80 metrekupî yo. Îstasyonê Xefse û Babîrî zî seba şaristanê Heleb û dewanê aye sanîye de nêzdîyê se ra 70î awe ancenê, verê naye zî berê awdayîşî qet nêbo Belîxe de sanîye de se ra 70î awe ancenê.
Awbendê Firatî nêzdîyê ‘Asta merdeyî’ de yo
El Ubêd va ke asta awa Gola Firatî 7 metreyan ra zafêr dekewta û awbend ameyo astêka krîtîk û wina va: “ Se ra 80î depoyê stratejîkî yê gole ameyo xerckerdiş û êdî awbend xeylê nêzdîyê “asta merdeyî” bîyo. No zî yeno a mana ke kar bi temamî vinderto. Awbendê Firatî çimeyanê enerjî yê tewr muhîmî yê Vakur û Rojhilatê Sûrîye ra yew o. Şert û mercanê normalan de kapasîteyê berhemdayîşê ey nêzdîyê 880 MW cereyan o. No zî bi rayîrê 8 jeneratoran ke kapasîteyê her yewê înan 110 MW yo, yeno kerdene. La kêmîbîyayîşê rêjeyê awe bi sebebê dekewtişê verçimeyî yê berhemdayîşî û ameyo 440 MW û nika zî ver bi vindertișo pêroyî ra şono.”
Hemserekê Desteya Enerjî yê Kantonê Tebqa Macîd El Ebdo zî diyar kerd ke kêmîbîyayîşê asta awa Çemê Firatî bîyo sebebê kêmîkerdişê saetanê xebitnayîşê cereyanî û her wina Desteya Enerjî ya Îdareyê Xoserî bi garantîya Îdareyê Awbendî, programê stratejîkî aver berde yê ke asta awa Gola Firatî bi qasê ke mumkun o bipawo, çimkî saetê xebitnayîşî nika astê kêmî de sînordar î.
24ê Gulane de Wezîrê Çimeyanê Awe yê Iraqî Ewn Ebdullah va ke, Iraq Tirkîya reyde yew peyman kerda ke mîqdarê awa ke Tirkîya seba çemê Firatî veradana sanîye de bigîrê asta 500 metrekupî. La Tirkîya na peymane ser o nêvinderta û hukmatî vurîyayîşî yê Sûrîye vera ne felaketî de ke gefan keno ciwîyayîşê milyonan Sûrîyeyîjan, bêveng o.
