Temsîlkarê SOHR’î derheqê kiştişanê Sûrîye de daneyê 24 saetanê peyênan pare kerdê. Goreyê SOHR’î Sûrîye de 24 saetanê peyênan de 11ê ci xerib, pêroyê 19 kesî ameyê kiştene.
Merkezê Çimdarîya Heqanê Merdiman ê Sûrîye (SOHR) derheqê binpaykerdişanê heqanê merdiman ê herême de rojane raporan amade keno. Goreyê daneyanê peyênan ê SOHR’î yê 24 saetan tewr kêm 19 kesî herêmanê cîya yê Sûrîye de ameyê kiştene.
Merkezê Çimdarîya Heqanê Merdiman ê Sûrîye (SOHR) da zanayene ke Îdlîb de atolyeyêka viraştişê cebilxaneyan ê grûbanê xerîban (Tirkîstan-Ozbek) ê mîyanê hêzanê hukmato demkî yê Sûrîye de, teqînek bîyo û tewr kêm 10 kesî ameyê kiştene û 9 kesî birîndar bîyê. Şaristanokê Siwêdan ê rojhelatê Dêrazorî de riyê nakokîyanê keyeyî yê erdî ser o şer vejîya. Encamî de ciwanêk ame kiştene. Dewa Cibrîn a şaristanê Hema de zî teqînek bi û encamî de 1ê ci gede, 3 kesî ameyê kiştene.
SOHR’î da zanayene ke bejayîya Herîbşe ya başûrê Dêrazorî de riyê teqîyayîşê mayînêkî de ciwanêk cuya xo vîndî kerda. Heleb de zî cinîyêka ciwane ke aşmêk ra ver encamê gulevaranê bêserûber de birîndar bîbî, cuya xo vîndî kerde. Ame zanayene ke şaristanokê Helfa yê Şamî de zî encamê gulevaranê bêserûber de ciwanêko bîn ameyo kiştene.
Goreyê SOHR’î şaristanokê Mehece yê vakurê Derayî de zî çekdarê xerîbî şewe eşto keyeyêk ser o û ciwanêk kişto. SOHR’î eşkera kerd ke taxa Cebelî ya şaristanokê Selqîn ê Îdlîbî de zî hêrişê çekdaranê xerîbî de “cîhadîstêko iraqî” ame kişte.
SOHR’î dîyar kerd ke 14 serranê peyênan de 656 hezar û 493 kesî ameyê kiştene.
Goreyê daneyanê SOHR’î 14 serranê peyênan de şerê mîyanên û hêrişanê DAÎŞ’î yê vera Vakur û Rojhelatê Sûrîye û pêroyê Sûrîye ra pey 656 hezar û 493 kesî ameyê kiştene.
