Ecûrê ke Amed û Mêrdîn de resenî, serê tableyan de cayê xo girewtî. Rotoxanê ecûran dîyar kerdî ke her roj bi seyan kîlo ecûrî roşenî.
Wexto ke demserre bena germî, kuçeyanê Kurdistanî de boya ecûran vila beno. Zaf kuçe û caddeyê Amedî bi tableyê ecûran bar bîyî. Qezaya Sûrî ya Amedî de sereyê her kuçeyî de yew tableya ecûran est a. Zafê ecûran Mêrdîn ra yenî Amed û tayê ecûrî zî baxçeyanê Amedî ra yê. Ecûrî hem nika yenî werdene hem zî zaf kesî seba tirşîkerdişî gênî. Şarê Amedî dîyar keno ke ê zaf ecûran ra hez kenî.
Tayê tableyî ecûran bi kîloyan roşenî. Kîloyê ecûran bi 80 lîreyî roşenî. Tayê tableyî zî yew bi yew roşenî. Wexto ke yew bi yew roşenî zî hebê ecûran bi 30 lîreyî roşenî. Serê tableyî de ecûran rêz kenî, cemidî kenî mîyanê ey û tayê welatî zî yenî paya ser o gênî û wenî.
Rotoxanê ecûran dîyar kerdî ke kesê ke şariştananê Tirkîya ra yenî reya verêne ecûran vînenî û wenî û bi kîloyan gênî.
Rotoxê ecûran Samî Geçtî dîyar kerd ke o ecûran Mêrdîn ra gêno û va: “Ma ecûran Mêrdîn ra anenî. Ma bi kîloyan roşenî. Kîloyê ecûran 80 lîre yo. Şar zaf ey ra hes keno û zaf yeno rotîş. Ez ecûran heb bi heb roşena, rojê 30 kîlo zêdêr roşena.”
